Полицајците незадоволни како се делат унапредувања

Расте довербата на граѓаните во полицијата, но во нејзините редови тлее незадоволство од ротациите на работните места

Расте довербата на граѓаните во полицијата и тие се чувствуваат побезбедни во поглед на најголемите грижи што досега ги мачеле, а тоа се злоупотребата на дрога, малолетничката деликвенција, разбојништвата или кражбите. Примарна грижа на граѓаните остануваат „непочитувањето на прописите во сообраќајот“ и „животните скитници“. Сепак, најсериозен проблем останува непочитувањето на професионалните критериуми при унапредувањето во полициските редови. Ова се само дел од резултатите од истражувањето на агенцијата „Рејтинг“ за полициското работење во заедницата во изминативе две години. Истражувањето е спроведено од Набљудувачката мисија на ОБСЕ во Скопје во текот на јули и во август годинава, врз 2.600 испитаници, граѓани и 500 припадници на полицијата. Тоа беше презентирано вчера на работилница за соработката на полицијата и заедницата по повод 9 Декември - Денот на превенцијата.

Министерката за внатрешни работи, Гордана Јанкулоска, оцени дека извештајот е објективен, но потврди дека и покрај зголемувањето на чувството на безбедност и блискоста што ја чувствуваат со полицијата, кај голем дел од полициските службеници постои убедување дека се унапредуваат без оглед на професионалните критериуми.

Според неа, од ова може да се извлече заклучок дека биле поставени вистинските луѓе на вистинските места, без разлика на негодувањето на дел од службениците. Но, истовремено може да се толкува и како несогласување на полицајците со новопоставените барања и критериуми, како и напуштање на стариот начин на работа. „Сепак, тоа не смее да не' амнестира од воспоставувањето на транспарентен систем на кариера во полицијата“, вели Јанкулоска.

Според истражувањето, грижите на граѓаните во однос на злоупотребата на дрога, малолетничката деликвенција, разбојништвата или кражбите, се намалиле од 20 до 25 проценти. Бројот на граѓаните, пак, што сметаат дека полицијата се однесува кон нив фер и со почит се зголемил за 10 проценти.

„Во мултикултурни средини како нашата од особена важност е зголемувањето на довербата на граѓаните и покачувањето за 13 отсто на оние граѓани што сметаат дека полицијата се однесува еднакво кон сите етнички групи“, смета министерката.

„Споредено со претходните истражувања, резултатите за 2010 покажаа подобрување во перцепцијата на јавноста за услугите на полицијата и поголема решеност на граѓаните за вклучување во партнерства меѓу полицијата и јавноста. Исто така покажа позитивен тренд во перцепцијата на полициските службеници за сопствената работа“, изјави амбасадорот на набљудувачката мисија на ОБСЕ во земјава, Хозе Луис Хереро. (Х.Р.)