Насловна

Црквата во Мала Речица никнува од темел

Градежни претпријатија, чии сопственици се Албанци, помагаат со материјали

ТЕТОВО - Манастирот „Свети Ѓорѓија“ во Мала Речица, Тетовско, повторно станува место за собирање не само на православни верници, туку и на други намерници. Целиот простор што зафаќа речиси четири илјади квадратни метри се оплеменува, а на местото каде што се нао��аше храм подигнат во 14 век, повторно се издигнува нова црква.

„Објектот го подигнавме на старите темели. Градежните работи почнаа лани во ноември, со благослов на владиката г. Кирил. Црквата веќе го доби вистинскиот лик и се надеваме дека наскоро, по повод на некој од есенските празници што се одбележуваат овде, да биде осветена“, изјави Никола Јовановски, претседател на Иницијативниот одбор за обнова.

Според Јовановски, сите 15 члена на одборот се ангажирани во возобновувањето на храмот и токму поради тоа се постигнати големи успеси во градбата. „Најнапред воспоставивме врска со челните луѓе од тетовското муфтивство на ИВЗ бидејќи во Мала Речица живее исклучиво население од албанската заедница. Одлично бевме примени и разбрани по што уследија контакти и договори со локалните џамиски одбори. Од нив добивме ‘алал‘ што беше знак да започнеме со градбата. И нивните резони беа да се гради објект независно на која верска заедница му припаѓа“, продолжува Јовановски.

Градежни претпријатија чии сопственици се Албанци помагаат со материјали, некои ги подаруваат, а други бараат минимален надомест. Компанијата „Ренова“ донирала суви малтери. На црквата е поставена електрична и друга инсталација, лимарија, а изработена е и фасадата.

„Постигнатото до сега не' стимулираше уште повеќе да се ангажираме. За објектот се потрошени околу 25.000 евра, а за довршување се потребни 40.000 евра. Се надеваме на финансиска поддршка и од други дародавци“, оптимист е Никола Јовановски. Потоа треба да се изградат конаци, трпезарија, кујна и отворена појата.

Манастирот „Св. Ѓорѓија“ во Мала Речица претставува споменик на културата од 14 век. Од подметнат пожар во конфликтната 2001 година до темел изгореа сите објекти. Десетина години во овој комплекс немаше посетители.