Во Битола пронајдено копје за пробивање штит од 11 век
Истражувањата под Јени Џамија во Битола ќе продолжат напролет
Стручна екипа од археолози предводени од Гордана Филиповска Лазаровска, за време на истражувањата и ископите на длабочина од 4,5 метри под Јени Џамија во Битола, прв пат на овие простори пронајде копје за пробивање штит, кое датира од 11 или 12 век. „Станува збор за железно копје долго 27 сантиметри со специјална обработка на врвот кое служело за пробивање на штитови. Овој прв пронајдок во Битола, наскоро ќе се конзервира и ќе биде достапен за јавноста“, изјави Филиповска-Лазаровска, кустос во НУ Завод и Музеј-Битола.
Археолозите сметаат дека ова копје е употребено во 11 или 12 век за време на нападот и освојувањето на една од трите цркви кои биле лоцирани во центарот на сегашна Битола. „Oткриeна е и ретка икона која со помош на синџирче или врвца се носи на градите. На едната страна се ликовите на Свети Ѓорѓи и Свети Теодор, а на другата ликовите Свети Никола и Свети Василиј“, посочи Филиповска-Лазаровска.
Археолошките истражувања под Јени Џамија во Битола ќе продолжат напролет. „Со оглед дека неодамна го пронајдовме северниот ѕид од најстарата црква, очекуваме со продолжување на ископите да стигнеме и до олтарот, кој исто така се наоѓа под сегашната Јени Џамија“, појасни Гордана Филиповска-Лазаровска, раководител на проектот „Систематски истражувања во Јени џамија“, поддржан од Министерството за култура. (МИА) |
