Почина четирикратниот убиец, за двегодишната ќерка ќе се грижи дедото
Пред убиствата, Раиф Качар пиел во бар, се жалел дека останал сам, но не навестувал крвав поход
Горан Адамовски
Нашинецот Раиф Качар (42), кој во неделата уби четири лица во Чешка, а потоа си стрелаше во глава, завчера почина во болницата во Острава. Неговото тело најдоцна за една недела ќе пристигне во Скопје, а потоа и во родното село Долно Коњаре. За двегодишната ќерка на Раиф и на Влатка ќе се грижи братот од таткото на 25-годишната Чехинка.
„По неколкудневна борба за неговиот живот, кај пациентот, кој во коматозна состојба беше пренесен во нашата болница, е констатирана клиничка смрт на мозокот“, изјавил за чешките медиуми директорот на болницата во Острава, Томас Оборни.
Неговите роднини во скопското село Долно Коњаре, кои чекаа виза за да заминат во Чешка, сега се подготвуваат за погреб.
„В понеделник имаме состанок во чешката амбасада во Скопје и најдоцна за една недела телото на Раиф ќе биде пренесено во земјава“, велат роднините на Качар.
Чешкиот весник „Блеск“, повикувајќи се на полицискиот извештај, пишува дека пред убиствата, Качар со своите другари пиел во еден бар во Острава. „Според сведочењето на еден од неговите пријатели, Качар се жалел дека изгубил се': детето, жената и станот, но не спомнал ниту навестувал дека планира масакр“, пишува весникот.
Според истрагата, Качар потоа заминал во блискиот град Петрвалд, ја урнал влезната врата од кафеаната каде што Влатка го прославувала 25 роденден, а татко и' Владимир 50-от. Со пиштолот што го поседувал без дозвола, најнапред ја застрелал 46-годишната мајка на сопругата, потоа татко и', п�� Влатка, нејзиниот 34-годишен пријател, за на крајот да си стрела во главата.
Чешките медиуми пишуваат дека Качар не можел да се помири дека е готово меѓу него и Влатка.
„Затоа, постојано ја малтретирал. Еднаш и' ја удрил главата од ѕид“, пишува „Блеск“. Случајот бил пријавен во полиција, но Качар успеал да избегне казна, бидејќи Влатка не сакала да сведочи против него.
„Освен што не сакаше да сведочи, таа одби и да ни ги покаже медицинските белешки“, вели портпаролката на полицијата во Острава, Габриела Холчакова.
Двегодишната Николка сега е во рацете на бабата и на чичко и' на Влатка.
„Судот ќе треба да одлучи што понатаму, но нема сомнение дека Николка ќе остане со нас“, вели за тамошните медиуми, братот на убиениот Владимир.
Блиските на Качар негираат дека тој ја малтретирал невенчаната сопруга. Како причина за убиството го наведуваат неверството на Влатка. Раиф Качар веќе 20 години живеел во Чешка, а со Влатка бил во невенчан брак околу шест години. Претходно бил женет и разведен во Унгарија. Од тој брак имал три деца.
|
