| Хирург „оперирал“ осигурителни компании
Министерството за внатрешни работи поднесе уште една кривична пријава против познатиот хирург од Градската болница Ѕ.Н. (48). Според МВР, хирургот на девет лица што биле полесно повредени во сообраќајни несреќи им пишал тешки телесни повреди за да можат да извлечат милионски суми од осигурителните компании. Докторот Ѕ.Н. веќе неколку пати беше пријавуван за примање поткуп, злоупотреба на службената положба и овластувањата, како и измами, за што беше казнуван од надлежните судови.
Делото за кое се товари хирургот во најновата пријава се случило во периодот од јули до ноември 2004 година. Имено, во болницата биле примени девет пациенти, кои се здобиле со полесни повреди во пет различни сообраќајки. Според МВР, тие намерно биле задржувани во болницата, а потоа добивале лекарско уверение дека имаат фрактури. Со овие документи, пациентите оделе во две осигурителни компании во Скопје и од нив наплатиле 4,8 милиони денари за отштета, тврди МВР. (Г.А.) |
