Само што донесена, една од најновите владини мерки со која цената на дворовите се намали на едно евро за квадратен метар веќе наидува на жестоки реакции и на критики дека е спротивна на Уставот. Имено, дел од граѓаните веќе ги откупија своите дворови за многу повисоки цени, кои важеа во текот на досегашниот период, односно до 13 евра или 800 денари за квадратен метар. Затоа сега експертите и опозицијата со право прашуваат кој ќе им ја врати разликата во цената што ја платиле. Аналитичарите укажуваат дека оваа одлука е неуставна, бидејќи со неа се доведуваат во нееднаква положба граѓаните кои порано платиле повеќе за своите дворни места.

Инаку, Владата завчера соопшти дека македонските граѓани веќе можат да го откупуваат дворното земјиште на своите куќи и станбените згради по само едно евро. „За двор од 500 квадратни метри, до денес, во општините Карпош, Центар, Кисела Вода, Чаир или Аеродром требаше да се плати околу 5,5 - 6,5 илјади евра. Со намалувањето на цената на само едно евро за квадратен метар, за истиот двор граѓанинот во иднина ќе треба да плати само 500 евра“, изјави премиерот Никола Груевски.

По едно евро ќе се продава и земјиштето кое се наоѓа под или околу постојните објекти за спорт и рекреација, инфраструктурните објекти, објектите за јавни институции. Досега, за еден квадратен метар дворно земјиште се плаќаше до 13 евра. „Одлуката се однесува на земјиштето под објектот и околу објектот, значи дворовите. Било да станува збир за двор на индивидуална куќа, било да станува збор за двор на зграда. Станарите пропорционално би го откупиле дворот на зградата, што ќе им даде можност за доградба и ќе ја елиминираат потребата понатаму да плаќаат под закуп“, изјави министерот за финансии, Зоран Ставревски.

Во Владата тврдат дека со ова се заокружува процесот на приватизација на земјиштето. Тоа ќе може да се стави во функција и при земање кредит во банка, но и при продажба.

Опозицијата експресно реагираше по оваа одлука на Владата, потсетувајќи дека истата Влада досега ја зголемила цената. „Токму СДСМ ја повикуваше Владата да ги намали цените за откуп на дворното земјиште во сопственост на државата. Да ја потсетиме јавноста дека Владата на Никола Груевски и ВМРО ДПМНЕ во изминативе три години два пати ја зголеми цената за откуп на дворовите по квадратен метар“, изјавија во СДСМ. Според нив, премиерот треба да одговори дали ќе им ја надомести разликата на граѓаните што платија поскапо. „Прашуваме дали Никола Груевски од својот џеб или од џебовите на своите министри сега ќе им ја врати разликата во цените на овие граѓани“, реагираа од опозицијата. (Н.Н.Ф.)