Стразбур ни пресуди за патарините

Судот пресуди дека 38 вработени од патарините биле неправедно притворени

Љубиша Станковиќ

Триесет и осумтемина приведени за злоупотреби на патарините, со месеци непотребно седеле во притвор. Поради ваквиот кикс, државата ќе треба на секој од нив да им исплати по 2.000 евра за трошоци, односно вкупно 76 илјади евра. Вака одлучи Европскиот суд за човекови права во Стразбур, кој постапуваше по жалбата поднесена од Никола Василковски и 37 лица обвинетиот во случајот „Змиско око“. Судот констатира дека притворот им бил неоправдано одреден или неоправдано им бил продолжен. Според Судот за човекови права, со тоа е прекршен член 5 став 3 од правото на слобода и сигурност од Европската конвенција за човекови права.

Судот во Стразбур не расправал за основата на предметот и обвинението што било поднесено за лицата што беа обвинети во случајот „Змиско око“, туку расправал исклучиво по жалбите на обвинетите за изречениот притвор.

Случајот „Змиско око“ го обелодени полицијата кон крајот на 2007 година како почеток на борбата против организираниот криминал и корупцијата. Само во првиот налет полицијата приведе 72 раководители и инкасатори на наплатните рампи. Кратко време по распитот на приведените за злосторничко здружување, за злоупотреба на службена должност и за примање поткуп, тие завршија во затворот „Скопје“.

Притворот на осомничените во „Змиско око“ им траеше од втората половина на ноември 2007 до средината на февруари следната година кога започна судскиот процес. Најголемиот дел од притворените излегоа на слобода паралелно со текот на судењето што заврши на крајот на ноември 2008 година.

Случајот „Змиско око“ е најголемиот случај во македонското правосудство со одржани 34 главни претреси, а имаше и шест одложувања.

Со првостепената пресуда, беа осудени само 13 од вкупно 72 обвинети, а за другите судот изрече затворски казни од по две години кои беа заменети со условни, доколку во наредните пет години не сторат друго кривично дело.

Две, највисоки казни, во траење од по четири години, им се изречени на обвинети кои за цело време откако е започната кривичната постапка беа недостапни за полициско-судските органи. Судот изречен и две затворски казни во траење од по три години. Едната од казните се однесува на првообвинетиот Зоран Јанески (45) викан Коко, а за осуммина други, главно, раководители и контролори беа казнети со две годишни затворски казни или на овие 13-мина обвинети за злоупотреба на службената положба и овластување им беше изречена пресуда од 30 години.

Судот ги задолжи сите обвинети солидарно да ја надоместат штетата од безмалку 170 милиони денари и да ги намират трошоците за водењето на постапката. Неколку месеци подоцна, Апелациониот суд во Скопје ја поништи донесената пресуда и случајот го врати отпочеток, но од март годинава досега никако да започне повторениот судски процес.