Уште тројца мажи вплеткани во штипскиот секс-скандал

Се шири истрагата околу проституцијата на двете девојчиња од Штип

Скандалот со малолетничката проституција на двете девојчиња од Штип доби ново продолжение. Полицијата приведе уште три лица што ќе одговараат за полов напад врз малолетник што не наполнил 14 години. Во меѓувреме, продолжува постапката против 11-мина инволвирани во случајот.

Според истрагата, Д.Ѓ. (36) од Куманово во април годинава, во неговиот стан во повеќе наврати извршил обесчестување и други полови дејства врз малолетничките, кои тогаш се' уште немале наполнето 14 години.

„Констатирано е дека и од март до јули годинава во повеќе наврати во мотел во Штип, како и во стан во населбата 8 Ноември и штипјанецот Е.Т. (35), извршил обесчестување и други полови дејства врз малолетничките“, соопшти МВР.

Охриѓанецот А.М. (31) е осомничен дека извршил обесчестување врз едната малолетничка во мај годинава додека таа била на екскурзија во Охрид. Од штипската полиција наведуваат дека продолжуваат со истрагата и оти во тек се проверки на други лица околу нивна можна инволвираност во случајот.

Како што веќе пишувавме, секс-скандал изби откако беше обелоденето дека возрасни лица имале сексуални односи со две девојчиња, од кои едното се' уште нема ниту 14 години. Подоцна полицијата приведе и осомничи две девојки на возраст од 20 и 23 години за подведување на децата, а еден наставник беше осомничен за обесчестување со злоупотреба на службената положба.

Како што информираше МВР, на листата на клиенти што плаќале од една до пет илјади денари за секс со малолетничките, биле познати бизнисмени и влијателни луѓе од неколку градови на возраст меѓу 30 и 65 години.

Долго време се водеа расправи дали предметот треба да прејде во скопското Основно обвинителство, но на крај се донесе одлука за него да расправа Основниот суд во Штип. (Г.А.)