Вработени на скопскиот аеродром краделе керозин

Со кривична пријава, поднесена до скопското Јавно обвинителство, полицијата осомничи двајца вработени на скопскиот аеродром „Александар Велики“ за кражба на гориво. Станува збор за лицата Д.М.(50) и Б.Н.(42) за кои од МВР велат дека кражбата започнала уште од почетокот на годината и траеле се' до минатиот четврток. Освен за продолжено дело кражба, споменатите се товарат и злоупотреба на службена положба и овластување.

Кражбата, осомничените ја сториле со тоа што го злоупотребиле своето работно место. Имено, првопријавениот Д.М. бил вработен како контролор во мониторинг-центарот, а второпријавениот Б.Н. како шеф на службата за безбедност на аеродромот. Тие во повеќе наврати источиле и украле околу 7.000 литри гориво со што АД „Макпетрол“ го оштетиле за 318.459 денари.

Полицијата, по добиени сознанија дека споменатите се потенцијални извршители на кражба на гориво од цистерните за гориво, паркирани на Аеродромот „Александар Велики“, бил извршен увид на самото местото, а по нивното приведување бил извршил и информативен разговор од кој било утврдено дека кражбите на гориво започнале уште од почетокот на годината, кога од паркираните цистерни, во континуитет источиле 6.694 литри, а дека на осми овој месец украле уште 170 литри.

Точењето на горивото најчесто се случувало во ноќните часови кога на Аеродромот немало слетувања и полетувања на авиони, односно додека вработените од „Макпетрол” биле во своите работни простории.

Кражбата ја вршеле така што од вентилите, од потцистерните, во канти источувале различна количина гориво, а со службените возила што ги користи обезбедувањето на аеродромот ги изнесувале надвор од објектот, а потоа или го продавале или го користеле за лични потреби.

При извршениот полициски увид, на самото место биле пронајдени пластичните канти, а во возилата со кои било пренесувано, пронајдени се траги од млазното гориво, кои се земени за криминалистичко-техничко вештачење.

Со барање за поведување истрага, осомничените се предадени на истражен судија, кој им одредил мерка притвор во времетраење од осум дена. (Љ.С.)