Двајца охридски лекари приведени поради примање поткуп

Лекарите-специјалисти примиле 700, односно 500 евра, а биле фатени со остатокот од 800 евра

Поради постоење основано сомнение дека сториле кривичното дело примање поткуп, охридската полиција поднела кривична пријава за двајца лекари од Општата болница во Охрид.

Според полицијата, пријавата се однесува на специјалисти - хирурзи Р.М. (50) и Г.Б. (41), вработени во работната единица Урологија при Општата болница во Охрид. На товар на лекарите им се става побаран поткуп од две илјади евра, или 120.000 денари, кои тие на 22 март ги побарале од засегнати родители, а за возврат да извршат службено дејство - лекување во хипербарична комора на четиригодишно дете. Ваквото лекување не смееле да извршат лекарите, бидејќи со одлука од јануари оваа година Општата болница донела решение за затворање на комората се' до носење соодветна правна регулатива и добивање согласност за користење од Министерството за здравство на РМ. Но, и покрај одлуката на болницата, на 29 март оваа година, првопријавениот побарал и примил 700 евра од оштетените, а на 3 април, според кажувањата на оштетените, и второпријавениот побарал и примил 500 евра.

За парите што ги примиле, лекарите не издале никаква потврда што, пак, ставило сомнеж кај оштетените во однос на чинењето и валидноста на медицинскиот третман. Токму од таа причина тие решиле да побараат и писмена потврда за дадените пари. Сега осомничените лекари им издале белешка, која не била архивирана и заведена, но токму тоа било мотив за нивно пријавување.

Случајот бил пријавен во полиција, а биле преземени сите потребни оперативно-тактички мерки за докажување на делото. Полицијата во координација со Јавното обвинителство, на оштетените им подметнало технички обработени банкноти во висина на износот што требало да го доисплатат оштетените.

Разврска на случајот доаѓа во петокот вечер кога технички обработените 800 евра, според договореното, му биле исплатени на првоосомничениот, кој, пак, со примањето на парите се стекнал со противправна имотна корист од 1.500 евра. Но, по исплатата на парите, а со претходно добиена наредба од истражен судија, полицијата извршила претрес во Одделението за урологија и притоа, кај Р.М. биле пронајдени обработените девизи. Освен обработените евра, полицијата пронашла уште 1.980 евра и 1.960 денари, но сега се работи на утврдување на потеклото на овие пари.

Од МВР потсетуваат дека со писмен акт од Универзитетската клиника за пластична и реконструктивна хирургија од Скопје, лекувањето во хиперболична комора се врши со син картон и со партиципација од 450 денари за третман. (С.И.-Љ.Ц)