Да се тегнат за уши родители на проблематични деца

Родителите чии деца покажуваат слаби резултати во учењето, учествуваат во тепачки и во други форми на насилство или се недисциплинирани треба да бидат упатени на советување од стручни лица. Вака се изјасниле дури 80,1 процент или 889 од испитаниците во анкетата што била спроведена за потребите на Министерството за образование и наука. Негативно мислење за т.н. родителска школа, пак, имале само 14,2 проценти од анкетираните.

Овие податоци вчера ги презентираше самото Министерство за образование, од каде што посочија дека анкетата ја спровел Институтот за политички истражувања – Скопје од 18 до 19 декември година. Со анонимната телефонска анкета биле опфатени 1.100 испитаници.

Според сондажата, најголем процент од граѓаните сметаат дека треба да се забрани непотизмот на високообразовните институции, но и дека државните универзитети треба да дадат отчет за тоа како се трошат парите од школарините.

За проектот за реорганизација на Универзитетот „Св. Кирил и Методиј“ на пет универзитети позитивно се изјасниле 37,4 проценти, негативно 32,3, додека не знаат или немаат одговор 30,4 проценти од анкетираните.

На прашањето, пак, дали треба да се воведе екстерна евалуација во високото образование, 79 отсто одговориле позитивно, а 11,7 проценти се изјасниле дека не е потребно тоа. (П.Р.)