Македонските амбасадори на брифинг во Скопје

По едногодишна пауза, утре во Домот на АРМ ќе се одржи Дипломатски совет на кој треба да присуствуваат македонските амбасадори, но не сите четириесетина туку само тие што за празниците дошле во земјата.Според неофицијални информации од Министерството за надворешни работи, во согласност со вообичаената практика на работниот состанок ќе се слушне се' она што го постигнала македонската дипломатија во годината што изминува, ќе се разменат информации, но и ќе се договара стратегијата за идната година.

Цел на Советот е да се слушне од прва рака за приоритетите што се од интерес на земјава и да се добијат инструкции како да се дејствува за нивно остварување. Состанокот ќе го води шефот на дипломатијата, Антонио Милошоски, а подоцна дипломатите ќе имаат одделни средби со премиерот Никола Груевски и со претседателот на државата, Ѓорге Иванов, средби за кои вчера се' уште се чекаше потврда од нивните кабинети.

Лани, неодржувањето на Дипломатскиот совет беше критикувано од стручната јавност како несериозен потег, а објаснувањето на МНР беше дека тоа чини многу пари, па како мерка на штедење тој беше „прескокнат“. (Т.Г.)