Само една третина се надева на среќна Нова 2011

Новата 2011 да биде подобра од годината што изминува очекуваат 33 проценти од граѓаните на Македонија, еден процент повеќе сметаат дека следната година ќе биде иста, додека 30 отсто сметаат оти ќе биде полошо. Такви се резултатите од истражувањето „Глобален барометар“ на Галуп интернешенел, според кое поголеми оптимисти од Македонците за наредната година се жителите на Косово - 55 проценти, а помали граѓаните на Босна и Херцеговина - 22 процента, на Бугарија - 21 и на Србија -11 проценти.

На прашањето дали 2011 ќе биде година на економски просперитет, 21 отсто од анкетираните македонски граѓани одговориле потврдно, 42 процента дека ќе биде исто, а 34 очекуваат полошо. За Македонците најголем економски проблем останува невработеноста, така што 45 проценти очекуваат таа в година да се зголеми, 24 да се намали, а 27 отсто сметаат дека ќе остане на исто ниво како годинава.

Истражувањето на Галуп е спроведено во 53 земји, во кои живее 76 отсто од светската популација. Резултатите покажуваат дека 42 отсто од анкетираните очекуваат 2011 на глобално ниво да биде подобра од 2010 година, а 19 проценти се песимисти. Во земјава биле анкетирани 1.213 лица во периодот од 22 до 29 октомври. (П.Р.)