Туристичката населба Лагадин плива во ѓубре

Мики Трајковски

ОХРИД - Во смрдеа што се шири на сите страни од насобраното и неисчистено ѓубре со денови се дават гостите и жителите во туристичката населба Лагадин, една од најпосетените на охридската ривиера. Купиштата смет насобрани покрај плажата и неподносливата реа ги бркаат туристите од овој крајбрежен појас, се жалат сопствениците на апартманите во Лагадин. И тоа не е се'. Кеси со отпад се оставаат и пред апартманите над патот, бидејќи нема канти. Туристите и охриѓаните коментираат дека локалните власти го запоставиле Охрид и дека летово се во длабок сон.

„Локалната самоуправа воопшто не води сметка за овој потег на Охридското Езеро“, вели жител на Лагадин. Вината за проблемот се лоцира и во државата, која според граѓаните, малку пари одвојува за Охрид, градот од кој може добро да живеат не само овдешните жители туку и цела Македонија.

Сметот не е единствената работа на која реагираат овие луѓе. Тие се револтирани и од високата цена што ја плаќале за комунална хигиена, а велат, сезоната трае само два месеца. „Ниту еден претставник на инспекциските служби како локални, така и државни, не дојде да не' посети за да види во каков хаос живееме. Ова го нема никаде. Наместо да се гордееме и да уживаме во тоа што ни го дала природата, ние се однесуваме тотално незаинтересирано“, огорчено раскажува гостин од Битола. Тој вели дека ќе размисли дали натаму ќе доаѓа во Охрид. „Само центарот на градот е среден, а другиот дел е целосно запуштен“, коментираат гости на Охрид.

Градежен отпад се депонира и во населбата, ама никој ништо не презема. И бучавата е голем проблем. Музиката што трешти од шанковите на околните плажи ги вознемирува туристите, а тие барајќи мир, бегаат на други места. Има многу работи на кои треба да им се стави крај, раскажуваат нашите соговорници.

Од ЈП „Охридски Комуналец“ одговараат дека пред стартот на сезоната ги отстраниле контејнерите од Лагадин. Тоа го направиле со цел да извршат притисок врз Министeрството за транспорт за да се натераат концесионерите на плажи со нив да склучат договори за подигање на сметот. Луѓето велат оти Охрид како туристичка дестинација не заслужува ваков однос ниту од министерството ниту од општината. Комуналното претпријатие подолго време прави напори да се реши овој проблем, а со тоа сите плажи да бидат чисти и средени. Но, за сега тоа е безуспешно, велат од претпријатието. Оттаму уште информираат дека досега склучиле договор за отстранување на сметот само со пет концесионери. Другите одбиле да го сторат тоа.

Од Министерството за транспорт и врски кратко одговорија дека тоа е надлежност на општината. Слична е состојбата и со останатите делови на Охрид. Со денови во периферните охридски населби не се чисти ѓубрето од контејнерите. Граѓаните реагираат, а бидејки нема каде да го остават, се снаоѓаат и загадуваат други места.

Иако градските власти уверуваат дека нивни екипи работат и во три смени, сликата од туристички Охрид и ова лето е дека со чистотата може да се пофали само центарот на градот. Проблем и годинава повторно се сите културноисториски локалитети. Неможноста за договор меѓу општината и Завод и музеј од Охрид си го направи своето, па и најпосетуваните места во градот се полни со ѓубре. Двете страни ја префрлаат топката на вината.

Од Завод и музеј велат дека имале склучено договор со општината за одлагање на сметот, додека оттаму, пак, дека досега не бил платен ниту денар за таа намена. Завод и музеј има обврска да го отстранува сметот од сите локалитети, а доколку не го прави тоа, за таа намена треба да плати на општинското јавно претпријатие, велат од охридски „Комуналец“.

И додека траат преписките меѓу локалната и централната власт, најмногу штети трпи туризмот. Ова е најслабата сезона во историјата. Друга е приказната со миризбата што се шири откако ќе свртите барем еден круг покрај плоштадот. Пченки, американски крофни, пржен помфрит, сендвичи „мекдоналдс“ од една страна, и неподносливата миризба кај малиот мост покрај кејот на езерото го надополнуваат лошиот впечаток за Охрид.