Улиците во општина Чаир како швајцарско сирење

Не се вршат никакви реконструкции, бидејќи општината има финансиски проблеми

Снежана Калабакова


Улиците во општина Чаир личат на швајцарско сирење. Тротоарите, пак, се посебна приказна. На улицата „Втора македонска ударна бригада“, на потегот од поликлиниката „Чаир“ до општинската зграда, граѓаните место по тротоар се движат низ кал и вирови, зашто нема ниту асфалт ниту павер елементи. А токму на овој потег се наоѓаат неколку значајни објекти за општините Чаир и Бутел, како што се Здравствениот дом за трудова медицина, ПОУ „Иднина“ и здравствениот дом „Чаир“. Граѓаните се огорчени поради незаинтересираноста на општинарите да преземат мерки за санација на инфраструктурата.

Улицата „Втора македонска ударна бригада“, која по децентрализацијата стана општинска меѓа меѓу Чаир и Бутел, се разликува по левата и десната страна. Прво општина Бутел постави нови канделабри, а потоа и општина Чаир го осветли својот дел. Сега страната на Бутел, што во еден потег немаше тротоар, има убава пешачка патека од павер елементи, а делот што е во Чаир и натаму е во кал.

Преполна со дупки е и улицата „Благое Паровиќ“, главна сообраќајница во населбата Топанско Поле, по која поминува автобуската линија „9“. Ризично е по неа да се одвива сообраќај, што најдобро им е познато на возачите на автобусите, како и на населението што се жали дека им се оштетуваат автомобилите од дупките во асфалтот. На поголем дел од улицата нема тротоар, а пешаците се движат по паркингот под проширените балкони на зградите, или по калливата површина што треба да биде парк. Улицата е тесна и на неа не може да се разминат два автобуса.

Во општина Чаир одамна не се реконструирани улиците и тротоарите. Градоначалникот Изет Меџити вели дека се соочува со финансиски проблеми, бидејќи мината година Фондот за патишта, место осум милиони денари, им префрлил само три милиони денари, а годинава, пак, воопшто немало никакви најави за префрлање средства, кои инаку се општински пари собрани од регистрација на возила.

„Средствата се главна причина зошто досега не се реконструираат улиците. Деновиве ќе излеземе на терен да направиме увид и ќе одлучиме каде е најургентно да се интервенира со крпење. Оштетувања предизвикуваат и несовесните граѓани што ги раскопуваат улиците кога изведуваат градежни зафати, а потоа ги оставаат така. На располагање имаме малку средства што ги издвоивме од буџетот. Градот ќе ја финансира реконструкција на улиците ’Ќемал Сејфула‘ и ’Лазо Трповски‘. Со ’Улици и патишта‘ имаме договор за крпење на улици, а финансиски ќе учествуваме еднакво“, вели градоначалникот Меџити.