Трајановски ќе се поднови со осум возила

Автомобилите ќе ги користат администрацијата, и инспекциските служби

Градските власти ќе се подноват со осум возила, а истовремено ќе купуваат и клима-уреди и фотографска опрема. Веќе бараат најповолни понудувачи, но не откриваат колку се подготвени да платат за набавката. Планираат да купат еден автомобил од средна класа, едно теренско возило и шест лесни моторни возила. А колку клима-уреди ќе купат зависи од понудената цена.

За надлежните е недозволиво во тек на распишана набавка да се открива колку пари се издвоени за оваа намена.

Портпаролот на градоначалникот тврди дека за градоначалникот не е наменето ново возило. Автомобилите ќе се користеле за потребите на администрацијата, најмногу за инспекциските служби. Целата набавка, заедно со клима-уредите и со фотографската опрема, била неопходна за функционирање на градската администрација.

„Набавката на возилата, всушност, е од лани и е одобрена од Советот. Сепак, минатата година не ја реализиравме поради недостиг на средства, а сега имаме поволна финансиска состојба. Возилата ни се неопходни, бидејќи имаме недостиг од возила за потребите на администрацијата, особено за инспекциските служби“, вели портпаролот Неделчо Крстевски. Тој појаснува дека е неопходна набавка на клима-уреди, за да се овозможат нормални услови за работа на администрацијата. И лани Градот купил одреден број клима-уреди и конвектори, а набавка се реализира и годинава, бидејќи се' уште има работни простории без апарати за разладување. (Дс.Т.)