Претходен број

Угостителите против целосната забрана за пушење

Поради целосната забрана на пушењето, која строго се контролира, гостите ги заобиколуваат кафеаните

Александрија Стевковска

Угостителите го кренаа својот глас против воведувањето на целосната забрана за пушење, барајќи одредбите од законот што се однесуваат на овие објекти да се ревидираат и да им се обезбеди натамошно работење со поделба на просторот на пушачки и непушачки. Според нив, поради целосната забрана на пушењето, која построго се контролира деновиве, гостите ги заобиколуваат. Тие најавуваат дека доколку продолжи примената на апсолутната забрана за пушење во објектите каде што се служи и храна, тие ќе се затворат за брзо време.

„Угостителите не се согласуваат со овој закон и бараме состанок со одговорните за донесувањето на ваков закон. Ваков закон и негова примена пресечена како со секира не може да му одговараат никому. Ние сме голема група објекти и луѓе кои заработуваме, плаќаме давачки кон државата, вработуваме луѓе, што значи дека голем дел од буџетот се полни со пари од нас. Со овој закон сме доведени во ситуација да работиме со 60 отсто помалку капацитет“, изјави претставникот на угостителите, Марко Силјановиќ на нивниот вчерашен состанок.

Според него, забраната за пушење ќе се одрази и врз работењето, но и на вработувањата, отпуштањата.

„Деновиве бевме во ситуација да не дозволуваме да има пепелници на маса, а уште помалку да дозволиме некој да запали цигара и видовме какво е расположението кај граѓаните. Тие ги напуштаат кафеаните, а според некои податоци, од 80 до 90 отсто од граѓаните во земјава се пушачи. Често станува збор за луѓе кои се од повисоко ниво, не се уличари, а ние ги тераме да стојат надвор на дожд и да пушат“, објаснува Силјановиќ.

Според него, ние сме далеку од Европа во делот на пресликување на европските закони.

„Како народ, имаме поинаков менталитет. Европејците имаат друг вид угостителство. Тие доаѓаат во ресторан, јадат и одат, а нашите луѓе сакаат да седнат да уживаат во кафеаната, која е наша традиционална љубов. Не можеме да спроведуваме закони како да сме Швеѓани или Данци“, додава Силјановиќ.

Според угостителите, тие дури сега реагираат на законот, бидејќи ниту надлежните не го познаваат законот.

„Секо�� инспектор ни дава различни информации. Наводно, ќе почнела примената за целосна забрана во 2010 година, а дотогаш ќе има поделба на просторот. Па некој ни дава информација дека ќе биде само за кафе-барови, па само за дискотеки, па нема да биде така. Дури сега ни е кажано дека законските измени се стапени во сила од 1 декември“, обвинуваат угостителите.

Според нив, в ред е заштитата на човечките права на непушачите, но и пушачите имаат свои права.

„Постојано се пласираат различни информации. На пример, беше кажано дека во дискотеките може да се пуши, а ние имаме информација дека во саботата бил затворен ’Хард-рок‘ по таа основа. Тие што учеле за тоа не знаат да ни ги протолкуваат законските измени, а ние треба да ги знаеме и да ги почитуваме. Тоа е нечуено“, велат угостителите.

Според нив, во октомвриските измени на Законот за пушење се вели дека во кафеани и пивници пушењето е дозволено до 1 јануари 2010 година. Имено, според законските измени на забраната за пушење од 19 август оваа година, во членот 2, алинеја 7 се додава нова алинеја што ги опфаќа кафеаните, кафетериите, ноќните барови, дискотеките и пивниците и во истите измени стои дека примената на забраната за пушење во овие објекти ќе почне да се применува од 1 јануари 2010 година.

Според Пазарната инспекција, во Законот за угостителска дејност не постои класификација на кафеани и пивници, па во сите објекти каде што се приготвува и послужува храна пушењето е забрането во целиот локал.

До јануари 2010 година, пушењето ќе биде делумно дозволено во кафетерии, ноќни барови, кафе-барови, кабареа, дискоклубови, каде што согласно со Законот за угостителска дејност треба да се обезбеди посебен простор за пушачи, кој ќе биде и соодветно означен.