Дијабетичарите пак во инсулинска криза

Во инсулинските аптеки во Скопје за нецел месец повторно нема одредени видови инсулин

Јасмина Јовановска



Во Скопје и во повеќе градови во земјава повторно се појави криза со инсулинот, терапија без која не можат да живеат дијабетичарите ниту еден ден. Во инсулинските аптеки во Скопје за неполн месец повторно нема одредени видови инсулин, а ништо подобра не е состојбата ни со снабденоста со инсулин во другите градови во земјава. Најаларматна е состојбата со ререзвите на инсулин во Велес, каде што нема ниту едно пенкало инсулин. Во другите градови, пак, количините на инсулин се крпат од денес за утре, односно ако нема денес, се носат нови количини за неколку денови, кои се трошат за еден ден.

Ваквата „крпена“ терапија повремено се јавува речиси во сите градови во земјава.

„Како може некој да си поигрува со нашите животи кога знаат дека секој стрес за нас значи покачување на шеќерот во крвта, кој потоа тешко може да се нормализира и со поголеми дози на инсулин“, вели еден дијабетичар од Скопје, кој сака да остане анонимен. Тој ја прашува власта кој ќе плати отштета за нарушување на нивната здравствена состојба зашто живеат во страв дали навреме ќе добијат инсулин.

Недостигот од инсулин ни го потврдија и во Здружението за дијабетичари во Скопје. „Точно е дека повторно ни се враќа кризата со инсулин. Во скопските инсулински аптеки веќе има недостиг од неколку видови инсулин. Ништо подобро не е ниту во инсулинските пунктови во другите градови. Засега, најлараматно е со терапијата за дијабетичарите во Велес, каде што во аптеката има само едно пенкало“, изјави Аврам Ванковски, претседател на Здружението на дијабетичари.

Ова е веќе трет пат годинава да се јавува криза со инсулин. Првиот пат беше поради неплатен долг кон доставувачот, па се испорачуваа мали пратки на инсулин. Последните две кризи се поради тоа што количините од годинашните тендери се потрошени и здравствените установи немаат пари за набавка на нови количини, додека се чека централната набавка што ја спроведува Министерството за здравство. Во Скопје раководството на Клиниката за еднокринологија, веќе еден месец одбива да набавува по пат на директна спогодба за мали количини, зашто тоа е незаконски.

За да се реши проблемот, како што дознаваме, вчера во Скопје бил спроведен мал тендер за потребите на скопските пациенти, кои ги има околу 11.000. Тендерот за Скопје ни го потврдија и во Здружението на дијабетичарите, од каде што велат дека тој е само еден вид инјекција, колку да се премости периодот до новата набавка преку централниот тендер. Ова, велат во Здружението, треба да биде пример и за другите градови, да се направат мали тендери додека не стартува големиот тендер за инсулин.