Нови колкови на Ортопедија

На Клиниката за ортопедски болести во Скопје, стручниот тим предводен од д-р Тодор Ношпал, на 40-годишна пациентка од Битола и' изврши прва операција на замена на вештачки колк со вградување нов вид протеза, направена според најновата биотехнологија на фирмата „Зимер“. Станува збор за нов тип вештачки колк, кој може да се моделира по величина и по форма, онака како што најмногу му одговара на пациентот, и освен за ревизија на стар колк, може да се употребува и кај пациенти што имаат големи оштетувања на бутната коска поради малигни процеси.

„Се воведува нов ревизионен систем, кој овозможува 320 комбинации на самата протеза, со која кај пациентите кои по првичната имплантација на вештачки колк имаат големо оштетување на коскеното ткиво, им се овозможува да добијат имплант, кој ќе биде како за нив направен.

Протезата може да се вградува директно и на самото место да се спојуваат деловите, во самата бутна коска, а може и надвор да се состават деловите, а потоа да се вградат“, истакна д-р Ношпал. Протезата чини 150.000 денари, кои ги рефундира Фондот за здравствено осигурување.

Според него, кога имплантот би се порачал само за еден пациент е многу скап, а овој систем овозможува на поевтин начин да се дојде до истото решение.

Тимот на ортопеди наведе дека ваквата операција е исклучително деликатна и тешка, но со усвојување на новата техника на оперирање практично се работи со минимална загуба на крв и во спинална регионална анестезија, а превенира и лекува тешки инвалидитети.

„Пациенти што биле секојдневно со болки и се движеле со патерици или биле во количка, по вградување на ваквите колкови, повторно може да се вратат во нормалниот живот“, вели д-р Оливер Камнар, кој со тимот в понеделник ќе ја направи втората ваква интервенција. (Ј.Ј.)