Ќе се гради нов мост за Ногаевци

Нема да се санира мостот што се урна под надојдената вода на Вардар и остави отсечени 400 жители од селото Ногаевци, Градско. На негово место ќе се изгради нов. Изградбата треба да заврши најдоцна до крај на идната година, а сега итно ќе се тампонира патот до Ногаевци преку селото Кочилари.

Вака одлучила Владата, сметајќи дека е тоа најдоброто решение.

Министерот за транспорт и врски, Миле Јанакиески, доцна завчера го посети местото и сам се увери дека урнатиот мост не може да се санира. Поради тоа, Јавното претпријатие „Македонија пат“ уште денеска ќе почне да го пробива и да го тампонира земјениот пат меѓу селата Ногаевци и Кочилари во должина од шест километри, со цел да се овозможи нормална патна комуникација за жителите. Јанакиески истакна дека општината Градско во соработка со градежни компании ќе направи проект за новиот мост, а Владата ќе ја разгледа можноста за помош при неговата изградба.

Жителите од Ногаевци веќе пет дена се отсечени од цивилизацијата откако надојдениот Вардар го урна мостот. Децата не одат во училиште, а прекината е и продажбата на земјоделски производи што е единствен извор на пари. (Б.А.)