„Дневник“ збогатен со магазинот „Публика“

Новиот неделник ќе му пркоси на мислењето дека печатените медиуми изумираат

„Храбро и смело, ’Публика’ ќе открива, ќе анализира и ќе истражува. Нема намера да молчи и да премолчува, да калкулира и да балансира, да еуфемизира и да се пришанчува, да коленичи и да клечи“. Ова е само дел од уводникот на првиот број на неделниот политички магазин во кој неговиот главен и одговорен уредник Зоран Димитровски одговара на прашањето - зошто ни треба „Публика“? Тој на вчерашната промоција на овој магазин, кој од денеска почнува да излегува во секој викенд-број на весникот „Дневник“, истакна дека улогата на неделникот ќе биде да ја издигне на сериозно ниво граѓанската свест и јавност наспроти сегашната поделеност, не само на политички, туку и на етнички табори.

„Излегувањето на ’Публика’ ќе му пркоси и ќе му се спротивставува на мислењето за изумирање на печатените медиуми“, констатира генералниот директор на МПМ, д-р Срѓан Керим.

Тој рече дека новиот магазин е производ на луѓе со креативност и одговорност. „Постојано сакаме да ја имаме публиката пред себе. Сакаме да имаме влијателни медиуми, бидејќи само силни медиуми можат да ги јакнат институциите на државата и нашите напори кон ЕУ и кон НАТО“, истакна Керим. Зборувајќи за создавањето на компанијата ВАЦ, која по уривањето на нацизмот во Германија влезе во процесот на воспоставување демократски односи во таа земја, тој повлече паралела со функционирањето на весниците на ВАЦ во Македонија, кои имаат голем придонес во демократијата на државата. Сепак, Керим посочи и на толеранцијата на власта спрема одредени медиуми, кои не само што ја кршат регуларноста на пазарот туку и ги уриваат основните стандарди на медиумите.

„Нашите весници немаат газди, како што е тоа пример со другите медиуми. Ние сме дел од компанијата ВАЦ и кај нас новинарството не е под влијание на политичките и бизнис-интересите на својот газда. Ги повикуваме сите медиуми да ги задржат стандардите и да воспостават регуларен и здрав пазар. Наша цел е да правиме брендови, а не по потреба да соборуваме власт. Владите доаѓаат и си заминуваат, но стандардите мора да останат“, порача Керим на вчерашната промоција на „Публика“. (Св.У.)