Македонија не знае кои граѓани се најдискриминирани

Тамара Грнчароска

Македонија нема податоци кои категории граѓани се најдискриминирани во земјава, иако вчера министерот за труд и социјала, Џељал Бајрами, заедно со народниот правобранител, Иџет Мемети, постојаниот координатор на ОН во Скопје, Дијадра Бојд, и евроамбасадорот Ерван Фуере го одбележуваше Светскиот ден на човековите права, што годинава им е посветен на борците против дискриминацијата.

Наводите на Бајрами се базираат врз, како што рече, „некои индикации“, но за конкретен одговор ќе треба да се почека да профункционира комисијата за заштита и спречување од дискриминација. Со нејзините податоци по шест месеци или една година ќе може да се констатира кои категории се најдискриминирани. Дотогаш, според Бајрами, „податоците на некој начин не ни се релевантни“. Сепак, тој е на став дека Владата е на добар пат да ги зајакне позициите на човековите права во Македонија со усвојување на Законот за недискриминација, чија имплементација треба да стапи во сила од 1 јануари.

Народниот правобранител посочи дека се' повеќе жалби се однесуваат на правосудните органи, потоа на работните односи, а се' почесто жалби има и за имотно-правни односи. Во поглед на дискриминацијата, Мемети рече дека државните институции ја носат најголемата одговорност за спроведување на заштитата на човековите права и недискриминацијата. „Нашето дејствување во минатите години покажа дека бележевме дискриминација и такви случаи што немаа соодветна перцепција од надлежните институции“, рече Мемети, кој смета дека тоа покажува ниска свест и непрофесионалност кон одлучувањето за правата на другите.

За евроамбасадорот, пак, највидлива дискриминација во земјава има спрема луѓето со инвалидитет и во поглед на пристап во објекти, но и за вработување, како и спрема ромската заедница, и тоа најмногу поради предрасудите. Фуере како охрабрувачки го оцени усвојувањето на Законот за недискриминација, но повтори дека тој целосно не кореспондира со стандардите на ЕУ. „Но, се надеваме дека овој закон ќе претрпи амандмански измени во насока на целосно исполнување на европските стандарди, што ќе гарантира дека сите форми на дискриминација ќе бидат елиминирани“, порача Фуере.