Уште два нови сомнителни случаи на грип
Бројот на сомнителни случаи заболени од новиот грип расте. На Инфективната клиника се примени два нови случаи со симптоми на грип. Едниот пациент пред да се разболи престојувал во Хрватска, додека другиот допатувал од Србија. Но, како што расте бројот на сомнителни случаи на новиот грип, така Министерството за здравство се' повеќе се затвора за информации околу грипот. Дали новите пациенти се наши државјани или не, или од која општина се, од Министерството за здравство не сакаат да откријат. За разлика од првиот случај, кога беа потранспарентни, сега од Министерството за здравство не сакаа ни да кажат на која возраст и од кој пол се заболените.
Затворањето за јавноста, од ресорното Министерство го објаснија со тоа дека „сме мала средина, па лесно може да се препознаат заболените и да се создаде непотребна стигма“. Со новите два случаи, досега на Инфективната клника вкупно има седум болнички згрижени пациенти, за кои се сомнева дека се заразени од пандемскиот грип.
До вчера попладне, од референтната лабораторија во Лондон не се пристигнати нови резултати. Засега во Македонија се регистрирани само два лабораториски потврдени случаи на новиот грип, кои веќе оздравеле, а едниот од нив е пуштен и дома. (Ј.Ј.)
|
