Пензионерите бараат социјална пензија

Сите лица постари од 65 години да имаат право на надомест

Пензионерите бараат да се воведе државна социјална пензија, со која сите лица постари од 65 години, без оглед на нивниот работен стаж, би имале право на паричен надомест. Ова е иницијатива која Сојузот на пензионери вчера ја образложиле пред министерот за труд и социјална политика, Џељаљ Бајрами, по повод Светскиот ден на стари лица.

„Во државата има над 200.000 лица постари од 65 години. Само околу 100.000 од нив добиваат пензија. Другите немаат пензија. Никој не знае ни кои се тие луѓе, ни како живеат. Во голем број држави има такви социјални пензии", изјави претседателот на Сојузот, Душко Шурбановски. Наедно, пензионерите бараат да се намалат и годините работен стаж за стекнување пензија. „Наместо 15 години работен стаж, во пензија да може да се замине и со пет години работа“, посочи Шурбановски и додаде дека на овој начин овие лица и здравствено ќе се осигурат и ќе може да ги користат услугите на дневните центри.

Пензионерите се пожалија и дека најмногу го почувствувале падот на стандардот на населението. „Една просечна пензија е само 50,5 отсто од една просечна плата, додека во 1992 година изнесувала дури 79 отсто од просечната плата“, појасни Шурбановски. Со ваков стандард, пензионерите од кои околу 30 отсто се со пензија под 6.000 денари едвај составуваат крај со крај од месецот. „Старите лица, поради кревкото здравје, речиси секојдневно имаат потреба од повеќе лекови, кои за нив се често се прескапи, па пензионерите се доведени во дилема дали да купат леб или лек“, укажува Шурбановски.

„Пензионерите немаат причина да се жалат од Владата, бидејќи пензиите се исплатуваат редовно во првата недела од месецот. Македонија е една од ретките држави која и во услови на криза успеала да оствари барем мало покачување на пензиите“, изјави министерот Бајрами. Тој најави дека до крајот на годинава Владата треба да усвои и национална стратегија за подобрување на статусот на старите лица. (Ј.Ј.)