Владата штеди на сметките за мобилки

Сметките за службените мобилни телефони што ги користат функционерите веројатно се прилично висока ставка која ја принуди Владата на штедење. Во оваа година на економска криза, Кабинетот на Никола Груевски реши да донесе две одлуки за ограничување на разговорите за службени потреби. За само пет месеци, високите службеници во државната управа, министри, нивни заменици, секретари, советници, раководители се лишени од привилегијата на мобилните за околу 1.000 денари месечно.

Што се однесува до четворицата вицепремиери, Зоран Ставрески, Владимир Пешевски, Васко Наумовски и Абдилаќим Адеми, тие остануваат во категоријата на бенефицираните, бидејќи за нив нема граници за мобилно зборување.

Според одлуката објавена во „Службен весник“ од 30 септември, а која стапи во сила во почетокот на минатиот месец, а ја потпиша вицепремиерот Зоран Ставрески, министрите кои до април 2009 имаа право на 4.900 денари месечни мобилни разговори, сега ќе имаат 3.920 денари. Лимитот за замениците-министри е симнат на 2.750 денари, пред тоа беше 3.500 денари. Колку за потсетување, во првата одлука за користење мобилен телефон донесена пред шест години министрите имаа право на разговори од 8.000 денари, за три години потоа да бидат лимитирани на 7.000 денари. Замениците на министрите од 6.000 денари за службени разговори паднаа на 5.000 денари.

Според септемвриската одлука, генералниот секретар на Владата ќе може да троши за службени потреби 3.360 денари наместо 4.200 денари.

Државните секретари во министерствата се лимитирани на 2.650 денари, пред тоа им беа дозволени телефонски импулси од 3.500 денари. Советниците и раководителите ќе можат да зборуваат за 1.680 и 1.120 денари во текот на еден месец, претходно лимитите за нив беа 2.100 и 1.400 денари.

Во овие износи не се вклучени месечната претплата и данокот на додадена вредност, за што, исто така, ќе се издвојуваат пари од државната каса. Во одлуката на Владата е предвидено раководителите на секторите да имаат право да одлучат колкумина и кои од вработените службеници ќе имаат право да користат службени мобилни. Износот на нивните сметки не смее да биде поголем од 500 денари. (К.Ч.)