ИНТЕРВЈУ

Сега е шанса да се притисне Грција

Даниел Кон Бендит, лидер на европските зелени

Потребно е да се прекине оваа игра со името,

Од нашиот дописник
Тони Гламчевски

Стразбур - Даниел Кон-Бендит, копретседател на групата на зелените во Европскиот парламент и еден од лидерите на новото политичко движење во Франција, Европа-екологија, за „Утрински весник“ се осврнува на проблемот со блокадата на европската интеграција на Македонија поради нерешеното прашање за името. Лидерот на студентските протести во мај 1968 година, во Франција, смета дека сега е шанса да се изврши притисок врз Грција за да направи отстапки за ова прашање, во замена за помошта што ќе ја добие од Европската унија. Кон-Бендит проблемот на Македонија го споредува со тој на Кипар, во кој до израз дојде немоќта на ЕУ да најде решение. Решението за излез од проблемот со името, според него, сепак, не може да дојде однадвор, бидејќи партијата се игра во Македонија и во Грција.



Господине Кон-Бендит, Вие и' станавте познат на македонската јавност со Вашата дискусија во Европскиот парламент, кога отворено изјавивте што мислите за проблемот со името на Македонија.

Во однос на проблемот со името на Македонија јас отсекогаш имам едноставна позиција. Јас велам Македонија е Македонија и ќе остане Македонија. Потребно е да се прекине со оваа игра. Но, тука, преку овој проблем, се гледа проблемот на сите одлуки што треба да се донесат едногласно во ЕУ. Се' додека Грција ја блокира одлуката за преговори за Македонија

тоа претставува проблем и во функционирањето на ЕУ. Сега постои можност вистински да преговараме со Грција за помошта за нејзин излез од кризата и за грчко попуштање во однос на името на Македонија. Тоа, можеби, би било можност да се излезе од ќор-сокакот.

Но, како може да се излезе од ќор-сокакот што ја блокира европската интеграција на Македонија?

Тоа може да се постигне така што ќе се врши притисок врз Грција да ја деблокира блокадата. Но, како што знаете, ние ја изгубивме битката со Кипар. Сега, како реакција на тоа, турската заедница избра националист за свој предводник, кој ја прави ситуацијата уште посложена. Ова, всушност, е во интерес на грчките националисти. Сега грчките кипарски националисти ќе можат да ги покажуваат со прст турските националисти и обратно. Тоа е резултат на немоќта на Европа со години да предложи и да наметне едно решение за Кипар.



Што мислите за притисоците што се вршат врз Македониј�� за менување на името?

Јас ви велам отворено - ова не е мојата шолја чај (не ми се допаѓа). Ако Македонија сака да си го зачува името Македонија, тоа мене ми одговара. Ако Македонија сака да си го промени името, тоа го прифаќам. Околу ова име направивме големо националистичко наддавање, како во Македонија, така и во Грција. Мислам дека би било добро да се истушираат за да се смират сите. Во спротивно, нема да излеземе од проблемот.



Политичката група на европските зелени секогаш и' даваше поддршка на Македонија. Дали таа може да поведе иницијатива за решавање на проблемот?

Би можеле да поведеме иницијатива, тоа би било иницијатива на компромис, под услов ако двете страни се подготвени да прифатат компромис. Засега реакцијата околу идентитетот е таа што блокира се' кај двете страни.



Дали Европа може да игра поголема улога во решавањето на проблемот, кој од почетокот е во ОН?

Секој му го дава жешкиот компир на другиот. Според мене, партијата се игра во Македонија и во Грција. Тие се оние што треба да станат поразумни. Тоа е истото она го знаеме со кипарските Грци и кипарските Турци. Ако не се рационални и ако не се раздвижат, тогаш не може да се најде решение меѓу Македонија и Грција. Кога постои националистичко лудило тогаш тешко може да се запре тоа.