Поглед

Прв случај, прв кикс

Катица Чангова

Антикорупциска комисија и со новоизбраниот шеф не успеа да се прешалтува во вистинската насока. Киксираше на првата одлука, со тоа што го заштити вицепремиерот Васко Наумовски и многу лесно го амнестира од одговорност. Не било пречка овој функционер да биде и министер и професор. Браво. Навистина голем успех за Антикорупциска.

Наумовски активно ќе работел на евроинтеграциите и на внесувањето на Македонија во Европа. Тоа што истата личност обезбеди професорско место додека е министер, но на Правен факултет нема да се активира, за Антикорупциска е доволно оправдување. Коректорите на власта – антикорупционерите, во овој случај, за жал, не видоа ниту коруптивно вработување ниту препознаа прикриена форма на влијание.

Престижната интелектуална професија ја резервирал вицепремиерот за себе и ја оставил во мирување, чувајќи ја како отстапница за утре. Значи, додека професор Наумовски реши да заснова реален работен однос, студентите ќе почекаат на часови по применети политички науки. Вакво нешто има само во Македонија, се разбира, не за сите. Во игра се само одбрани луѓе, првенствено докажани партиски кадри.

Неспојливоста на двете функции е спорна не само од правен карактер туку и од етички. Изостана издржан став од Антикорупциска. Со гребнување по површина и без посеопфатна истрага, комисионерите прогласија чист случај, но го ставија под сомнеж секое наредно постапување за слични предмети. Тоа што за ангажманот на вицепремиерот го вперија прстот на одговорност во Правниот факултет, воопшто не ја оправдува Антикорупциска, бидејќи се изместува тежиштето на одлуката. Темната дамка за идното работење на Наумовски, всушност, е црна дамка за Антикорупциска.