СРД: ВАЦ не го крши Законот за радиодифузија

Телевизискиот канал Визион плус е регистриран во Албанија и се реемитува преку операторите како и другите странски канали

Советот за радиодифузија потврди дека медиумската групација ВАЦ во Македонија не емитува телевизиска програма на територијата на нашата земја. Советот ја донесе ваквата одлука откако деновиве весникот „Шпиц“ излезе со обвиненија дека ВАЦ, покрај издавање на весниците „Дневник“, „Утрински“ и „Вест“, емитува и телевизиска програма преку телевизиската мрежа Визион плус. Во одговорот на СРД е наведено дека телевизискиот канал Визион плус од Албанија на кој се повикува весникот „Шпиц“, се реемитува преку операторите на јавните комуникациски мрежи исто како и другите странски канали.

„Ова значи дека не е прекршена ниту една одредба од Законот за радиодифузна дејност што се однесува на недозволена медиумска концентрација. Одредбите од македонскиот Закон за радиодифузна дејност се однесуваат на сопственичката поврзаност единствено меѓу субјекти што се под јурисдикција на Република Македонија. Телевизискиот канал Визион плус е правно лице регистрирано во Албанија и подлежи на регулација согласно со албанските закони“, се наведува во соопштението на СРД. Оттаму потсетуваат дека македонските компании можат да се рекламираат и на странските канали, без разлика дали тие се реемитуваат во Македонија или не, согласно со нивните маркетиншки стратегии.