Скопје игра по грчки ноти

Шеќеринска тврди дека заедничка позиција на власта и на опозицијата за името веќе не е можна

„Заедничка позиција на власта и на опозицијата околу спорот за името со Грција сега е невозможна“, изјави вчера Радмила Шеќеринска во дебатата на Граѓани за европска Македонија. Според неа, Владата не сака да го решава спорот, бидејќи само ваква, без алтернатива и замолчена Македонија, може да им гарантира успех на изборите.

„Во почетокот изгледаше дека антиквизацијата е само за внатрешна употреба и не бевме свесни колку ќе не' издевалвира во светот“, изјави таа додавајќи дека најмногу од се' загрижува американскиот молк околу Македонија, кој е полош и од евентуална американска критика. „Што да кажат, а што не кажале досега? И кој ќе ги чуе? Топката е во наши нозе и тие чекаат да дадеме гол, а ние седиме на трибините и само чекаме“, оцени таа.

Според неа, ако власта чека на одлуката на Хашкиот суд, ништо нема ��а се случи и во наредните 12 месеци, а ако одлуката е неповолна за Македонија, таа емоционална состојба ќе се искористи да се оди веднаш на избори, како што се случи по самитот на НАТО во Букурешт. Чекаме НАТО да го смени консензусот, ЕУ да се распадне, Грција да пропадне поради кризата, но реалноста е дека пропаѓа само Македонија“, изјави таа, додавајќи дека со ваквата политика Македонија игра по грчки ноти, а тоа не е патриотизам.

Прашана што и' дава кредибилитет да зборува за името кога самата на своето презиме Шеќеринска го додаде Јанковска, таа одговори дека сама си ја донела таквата одлука и дека со таа додавка не се чувствува помалку Шеќеринска отколку пред тоа. „Зборувате за победа околу името, за патриотизам. Има многу војсководци за таа битка, но ако се свртите, ќе видите дека нема војници што ќе ја водат“, реплицираше таа, додавајќи дека многу сме јаки кога се бориме за името на Интернет, дома и со пријатели на кафе, но кога треба вистински ангажман, ништо не се случува. Како илустрација таа посочи дека дури и меѓу парламентарците нема повеќе од тројца што можат да ги кажат деталите од последниот предлог на Метју Нимиц и дека целиот спор се следи на импровизаторски и наивен начин.

Околу феноменот со анкетите, како главен аргумент за непопустливоста за името, таа оцени дека со нив не се опипува пулсот, туку се диктира и иако на моменти се чини дека нешто турбо се случува околу спорот, Македонија само стои турбо. На критиката дека 16 години таа и другите политичари кажуваат исти работи и дека не и' држат забелешките дека Македонија е сиромашна бидејќи политичарите не се сиромашни, Шеќеринска одговори дека ваквото гледање на политиката ги држи во катанци, па го повика учесникот во дебатата да не чека и да се вклучи во менување на работите.

„И да не менувате на шест часа, исто ќе биде ако продолжиме со чекањето“, одговори таа, а на забелешката зошто СДСМ чекаше исто така и не го решаваше спорот, одговори: „Зашто тогаш можевме да си го дозволиме тоа. Сега не е можно“. (Н.Р.)