Премиерот Никола Груевски не планира нова реконструкција на владиниот кабинет, а одби да ги коментира и зачестените гласишта од својот коалиционен партнер ДУИ дека ќе има скора смена во министерствата со кои раководат. Исто така, тој не сакаше да дава прогнози каков ќе биде Извештајот на Европската комисија, но нагласи дека Владата максимално се труди да го исполни очекуваниот прогрес што го бара ЕК од Македонија.

„Даваме се' што е во наша моќ, фокусирани сме на тоа прашање, можеби како никогаш досега, и верувам дека ќе има некаков резултат“, изјави Груевски по посетата на скопската гимназија „Корчагин“. Изјавата на лидерот на СДСМ, Бранко Црвенковски, дека би застанал на антивладин протест на граѓаните, за премиерот е само опстојување на истата реторика од 2002 година. „Ако не ја променил реториката и она што го пласира, не очекувам дека ја променил и методологијата да се обиде да урне една власт и тој да дојде на власт, така што секаков вид интриги, манипулации, подметнувања, организирање штрајкови и протести очекувам од него, зашто тоа е негов начин на работење. Можеби не го бидува кога е на власт да осмисли проект или некоја позитивна работа за државата, но кога е во опозиција, за такви работи го бидува“, прокоментира Груевски.

На ова веднаш реагираше опозициската СДСМ, од каде што велат дека „од секоја изјава на премиерот Груевски станува се' поочигледна паранојата, нервозата и исфрустрираноста од лидерот Бранко Црвенковски“. Повторувајќи дека за сите неодговорни потези, лажни и нереализирани ветувања на премиерот, дежурен виновник е Црвенковски, од СДСМ го потсетија премиерот дека незадоволството на граѓаните секојдневно расте и станува понеиздржливо, а тоа било резултат на неодговорното владеење на Никола Груевски. (Б.Ј.)