Четиристотини основци од Подгорци не ја почнаа учебната година

СТРУГА - Околу 400 ученици од ОУ „Гоце Делчев“ во селото Подгорци, Струшко, вчера го бојкотираа почетокот на учебната година. Заедно со родителите тие бараат да се опреми новата училишна зграда, бидејќи старата е затворена од санитарната инспекција и е забрането да се употребува. Вчера не се остварија стравувањата дека ќе има бојкот на наставата во средните училишта „Нико Нестор“ и „Ибрахим Темо“ во Струга, каде што минатите две години имаше неколкумесечни прекини на наставата. На првиот училишен ден дојдоа и учениците Македонци и учениците Албанци. Според управата на училиштето, претходно бил пронајден компромис тие да учат не во етнички, туку во делумно комбинирани смени, со што се согласиле советите на родителите на двете училишта.

Напнато беше пред почетокот на наставата во селото Подгорци. „Не ги пуштивме нашите деца на настава во старата зграда на задружниот дом зашто таму нема никакви технички и хигиенски услови. Тоа може да биде опасно по здравјето на учениците, а евентуална зараза може да се прошири и на целото население“, објасни Мухамед Ајдиновски, претседател на Советот на родителите во ОУ „Гоце Делчев“ во село Подгорци. Родителите се револтирани од негрижата на Министерството за образование и наука, кое им ветило дека до почетокот на учебната година ќе ја доопреми новата училишна зграда. „На иницијатива на населението новото училиште почна да се гради во 2002 година и во него се вложени 700.000 евра, пред се', наши пари. Зградата е завршена пред 1,5 година и срамота е што Министерството досега не обезбеди средства за клупи, табли и столчиња, инвентар што чини околу 30.000 евра“, вели Мевмед Џемајловски, претседател на месната заедница. Тие и натаму имаат став да го продолжат бојкотот на наставата се' до отворањето на новата училишна зграда. Велат дека многупати досега контактирале и добивале ветување за помош од Министерството за образование, но ништо не се реализирало, па бојкотот им бил единствен начин да ги заштитат своите деца. (С.И.)