Министерот за здравство Бујар Османи и директорите на Фондот за здравствено осигурување, Јанез Јелникар и Маја Парнарџиева-Змејкова, вчера на заеднички состанок разговараа за новата позитивна листа проширена со 39 нови лекови, која веќе стартува во аптеките и за методологијата на утврдување на референтни цени на лековите.

„Од денеска, од страна на Фондот новите лекови ќе бидат 100 отсто рефундирани се' додека не ги утврдиме референтните цени кога пациентите со одредена доплата ќе ги земаат лековите директно во аптека и нема да ја плаќаат целата сума“, изјави по средбата министерот Османи.

Според него, важно е што граѓаните ќе може во аптеките да набават 39 лекови, кои претходно не беа на позитивна листа, со тоа што Фондот ќе ги рефундира 100 отсто по единствените цени.

„Додека се дефинира целиот процес, Фондот има одредени средства што се распоредуваат во согласност со законските намени за различни потреби. Ние ќе ги менаџираме средствата, кои се добиени по различни основи, навремено ќе се рефундираат сите средства по основ на позитивната листа и се надеваме дека нема да има никаков проблем“, рече в.д. директорката на ФЗО, Парнарџиева-Змејкова.

Во согласност со постапката граѓаните по плаќањето на лекот треба да достават фискална сметка по што за неколку денови Фондот ќе им ги рефундира средствата. (МИА)