Ладнокрвниот убиец Тони Манџа вратен во „Идризово“

Бугарија ни го испорача Тони Кечев (31), неколкупати осудуван за разни дела

Еден од најбараните македонски криминалци, гевгеличанецот Тони Кечев познат како Тони Манџа, вчера беше екстрадиран од Бугарија во земјава. Кечев, кого јавноста најмногу го памети по ладнокрвното убиство на полицаец и на случаен минувач извршено во Гевгелија пред 11 години, веднаш е префрлен во затворот „Идризово“. Против него има серија пресуди поради разни кривични дела.

Тони Манџа бил лоциран во Бугарија, каде што под друг идентитет, односно на име Лазар Маринов Русеков од Софија, издржувал затвор за кривично дело сторено во Бугарија. Македонската полиција испрати отпечатоци и фотографии на осуденикот, па откако неговиот идентитет бил потврден, Бугарите ни го екстрадираа нам. Кечев, кој беше баран со меѓународна, црвена потерница преку Интерпол, во Македонија беше испорачан преку Деве Баир со највисоки мерки на безбедност.

Кечев неколкупати беше апсен и бегаше од затворите. Последен пат, ланскиот јуни, успеа да побегне од Хируршкото одделение на гевгелиската болница откако му беше извршен хируршки зафат поради повреда на крвните садови на десната рака. Успеал да се ослободи од лисиците со кои бил врзан за болничкиот кревет и преку прозорецот, и покрај стражата пред неговата соба, скокнал и побегнал. Набргу по бегството, тој доброволно и' се предаде на полицијата. Истражен судија од Струмица му одреди притвор од 20 дена и Кечев беше префрлен во затворот во Прилеп.

Во 2005 година, пак, беше екстрадиран од Грција, а поради бегството од издржување казна, заработил уште шест месеци затвор.

Тој најмногу и' стана познат на јавноста во 1999 година кога по бегство од затвор, тргна да го реализира списокот со личности за елиминација. За двојното убиство во Гевгелија беше осуден на 15 години затвор. Во изминативе години неколку пати беше осудуван поради разни кривични дела. Годинава, во отсуство беше осуден на 10 години затвор поради разбојништво извршено во група.

„Додека бил малолетен, бил пријавуван за 24 дела ‘тешка кражба‘, за 21 кривично дело ‘одземање на моторно возило‘ и за пет кривични дела ‘кражба‘ за што му била изречена мерка ‘упатување во воспитно-поправен дом‘, соопшти полицијата. (Г.А.)