Бајруш понуди милиони, па го пуштија дома

Министерката Јанкулоска непријатно изненадена од одлуката на судот

Љубиша Станковиќ

Скопскиот Апелациски суд ги прифати гаранциите во кеш и во недвижен имот во замена за куќен притвор за кумановецот Бајруш Сејдиу.

Советот на Апелација ја донесе ваквата одлука во понеделникот, во доцните попладневни часови. Одлуката била донесена со понудени гаранции во висина од 1,4 милиони евра. Според наши сознанија, во делот од гаранциите имало и готови пари во висина од 110.000 евра.

„Точно е дека се понудени гаранции во недвижности: куќи, локали и земја. Тука не станува збор само за гаранции што ги понудиле роднини на обвинетиот, туку и негови блиски пријатели. Ова требаше да се случи многу порано, но и сега не е доцна“, ни вели еден од тимот адвокати на Сејдиу.

Министерката за внатрешни работи, Гордана Јанкулоска вчера изјави дека е непријатно изненадена од одлуката на судот. Таа, „со сета должна почит кон судот“, како што рече, се запрашала врз основа на кои документи била донесена таквата одлука. Јанкулоска нагласи дека ова решение нема да ја поколеба полицијата, процесот да заврши до крај.

Неговото ослободување доаѓа по три години од реализацијата на полициската акција „Пепел“, а со која беа опфатени повеќе од 30 лица, инаку блиски негови соработници, главно, раководен кадар во Тутунскиот комбинат „Боро Петрушевски-Папучар“ од Куманово.

Веќе првата година во скопскиот Кривичен суд започна еден од најобемните судења забележани во аналите на македонското судство. Бајруш Сејдии како првообвинет се товареше за четири кривични дела. Оваа пролет истиот суд ја донесе пресудата со која тој беше осуден на единствена затворска казна во траење од пет години, а согласно со која остана на доиздржување на мерката притвор се' до правосилноста на пресудата.

Упатувањето на Сејдиу на издржување куќен притвор претставува и своевиден шок во кој се најде нашиот правосуден систем. За скопскиот Кривичен суд е загрижувачки тоа што Апелација донела одлука со која тој се пушта на издржување мерка куќен притвор во моменти кога токму во повисокиот суд треба да се решава по неговата жалба за веќе изречената пресуда. Она што е многу битно е тоа што неговото ослободување доаѓа во моменти кога вториот судски процес што се води против него е во фаза на завршен збор. Од „единица“ велат дека немаат намера да ја коментираат одлуката на повисокиот суд, но дека би било реално да се причека уште неколку дена пред да се изрече и втората пресуда за него.

Во аферата „Пепел“, која, главно, се однесуваше на Бајруш Сеидиу, негови блиски соработници и роднини настрадаа и неколку десетици кумановски полицајци. Тие беа преместени или сменети од работните места лично од министерката за внатрешни работи Гордана Јанкулоска, а под образложение дека биле во блиски односи со Сејдиу. Во јавноста се говореше дека обвинението на Бајруш Сејиду било толкаво што „под него биле и судии и обвинители од Куманово“.