Дрвокрадците ги сардисаа шумите

Струмица - Масовно се сече шумата во Струмичко. Заклучно со јули годинава, поднесени се близу 1.400 кривични и прекршочни пријави, што е многу повеќе во споредба со лани кога за цела година биле поднесени две илјади пријави. Иако според надлежните во пролетните и летните месеци кражбите треба да стагнираат, тие се зголемуваат, па се очекува драстично зголемување на кражбите пред почетокот на грејната сезона.

„Ако продолжат кражбите и во наредните месеци, тогаш може да се очекува нивниот број постојано да расте. Ако имаме по 150 пријави месечно во просек, тогаш ќе дојдеме до бројката од речиси 2.800 откриени кражби“, вели Георги Петров, раководител на сектор за заштита на шуми при Шумското стопанство „Беласица“ од Струмица.

Во Струмичко шумата најмногу се краде во атарите на селата Баница, Свидовица, Висока Маала и Банско. Во кражбите се вклучени цели семејства што егзистираат од тоа. И покрај зачестените акции, дрвокрадците стануваат поагресивни, напаѓајќи ги шумарите и припадниците на Шумската полиција. Во последниот инцидент што се случи пред десетина дена, шумски полицајци беа нападнати со секири од дрвокрадци. (Е.П.)