Папата ќе поднесе оставка ако снеможи

Изненадувачка искреност на 83-годишниот Бенедикт Шеснаесетти

ВАТИКАН - Папата Бенедикт истакна во новата книга дека нема да се двоуми да стане првиот папа што доброволно ќе поднесе оставка во повеќе од 700 години, доколку се чувствува „физички, психолошки и духовно“ неспособен да ја води црквата. Со изненадувачка искреност 83-годишниот Бенедикт ја најави можноста за која претставниците на Католичката црква не сакаат да разговараат, бидејќи тоа би можело да ја отвори доктриналната кутија со црви.

Книгата „Светлината на светот: папата, црквата и знакот на времето“ досега се најде во насловите поради претпазливото отворање на папата за употребата на кондоми со цел да се спречи сидата. Меѓутоа, книгата, исто така, содржи многу лични размислувања за здравствената состојба на Бенедикт, неговата секојдневна рутина и неговата иднина.

„Да, ако папата сфати дека веќе физички, психолошки и духовно не е способен да ги спроведува должностите на својата функција, тогаш тој има право и, според некои околности, исто така, обврска да поднесе оставка“, вели новинарот Питер Зивалд, германски католик.

Последниот папа што доброволно поднесе оставка беше Целестин Петти во 1294 година по владеење од само пет месеци. Грегориј Дванаесетти абдицираше против своја волја во 1415 година за да се оконча спорот со ривалскиот претендент за Светата столица.

Во почетокот на годината, кога Ватикан го зафати нов бран скандали со сексуална злоупотреба, имаше повици Бенедикт да се повлече, но тој истакнува во книгата дека нема да „побегне“ во време на криза. „Може да се поднесе оставка во мирна доба или кога некој едноставно не може да продолжи“, вели тој.

Бенедикт е во релативно добра здравствена состојба, но во книгата признава дека силата му се намалува. „Секако, понекогаш сум загрижен и се прашувам дали можам да го остварам тоа дури од чисто физички поглед“, вели тој за својата сила за време на патувањата.

Починатиот папа Јован Павле, чија здравствена состојба се влоши во последните години од животот, размислуваше да се повлече, но тогаш му кажал на еден лекар дека во црквата нема место за почесен папа. (Ројтерс)