Младите битолчани на печалба на брод
Оваа сезона повеќе од 500 Македонци се пријавиле
за сезонска работа на брод
Битола - Се' повеќе млади битолчани заминуваат на печалба на брод. Притиснати од економски проблеми, без можност за вработување и шанса за егзистенција, младите се решаваат за сезонска работа на брод. Мажи и жени со средно или со високо образование летово наместо за одмор, размислуваат како да заработат за живот.
Оваа сезона над 500 млади од државата се пријавиле за работа на брод. Од нив, голем дел се од Битола, потврдуваат од ЈК „Трвел“, агенција за вработување во странство. Околу 20 илјади битолчани се без работа, најголем дел од нив се млади, а има и такви, кои со магистерски и со докторски титули, чекаат р��бота со години. За илјадници битолски семејства пензионерите се економскиот столб.
За печалба на брод не ви требаат титули, туку најдобрата препорака е познавање странски јазик. Такво е искуството на дипломираниот биотехнолог од Битола, Дијана Павловска. Таа порачува, кога се оди на брод, се оди за работа, а не за забава.
„Се вратив од работа на брод. Бев ангажирана на бродот ’Меркјури’ за пречекување и интеракција со странските гости. Ја добив оваа работа бидејќи покрај англиски јазик, зборувам и шпански и германски. Кога веќе одите да работите на брод, треба да знаете дека таму бараат работа. Иако покрај работа, има и убави моменти. Речиси секој ден си на различна локација. Тоа беше едно убаво искуство за мене“, вели младата Павловска, која со новата работа успеала да ги види Карибите, Мексико, Холивуд, па дури и северот на Алјаска.
Според статистиката на ЈК „Травел“ од Битола, стотици битолчани досега успеале да работат на брод. Од почетокот на оваа година голем е бројот на млади што аплицирале за ангажирање на брод. Директорот на агенцијата, Горан Јошевски, смета дека големиот интерес на битолчани за ваква работа е и поради тоа што бродските компании нудат големи бенефиции за своите работници. А потоа кога се бара работа на копно, интернационално искуство е предност за нив.
Работните места што им се нудат на младите Македонци се во ресторани, барови, кујна, хигиеничари, работа на базени. Заработката, велат, е од 700 до 2.500 долари месечно.
„Кај нас за работа на брод, пред се', аплицираат млади. Приоритет за добивање работата е да се зборува англиски јазик. Средно образование е доволно за да им се понуди компетентен кадар. Заработката е висока и примамлива ако се знае дека ниту еден од вработените нема трошоци за сместување и храна“, вели Јошевски.
За голем дел од младите битолчани работата на брод не е само сезонска. Светските води ги крстосуваат и по неколку години. Бродот велат им останал единствена шанса да градат кариера. (А.Б) |
