Побегнал од затвор оти и' љубоморел на сопругата

БИТОЛА - Од љубов или од љубомора побегнал осуденик од битолскиот затвор за да ги расчисти сметките со сопругата. Откако неговата понежна половина му соопштила дека нашла работа за себе, затвореникот не дочекал да се раздени. Вечерта веднаш нашол начин како да се соочи очи в очи со сопругата.

Меѓутоа, совесниот затвореник по бегството, заѕвонил на телефонот на затворската управа и ги известил надлежните раководители дека не мора да го бараат со потерница, бидејќи сам ќе се врател во ќелијата откако ќе ги надминел несогласувањата со сопругата.

Станува збор за 30-годишениот битолчанец И.Л., кој завчеравечер побегнал од затворот „Црн мост“, кад�� што одлежувал казна за разбојништво, дрога, учество во тепачки, тешки кражби и други кривични дела. Ова не е негово прво бегство. Тоа го практикувал и во изминатите години. „Осуден е на седум години и три месеци казна затвор, но на бегалецот му преостанува да одлежи уште една година и осум месеци“, велат од управата на битолскиот затвор.

„Ова што се случи со осуденикот не го сметаме за бегство, туку за оддалечување. Тој и претходно направи така и пак се врати назад за кусо време. Очекуваме и сега да се врати. Овој пат замина од затворот во моментот на престројувањето. Најверојатно, со помош на други затвореници, бидејќи имал некои семејни недоразбирања“, потврдува Славко Гацовски, управник на затворот во Битола.

Бегствата на осудениците од битолскиот затвор станаа секојденевје. Само во последните месеци во јавноста беа откриени четири бегства на осуденици. Според затворениците, состојбите во битолскиот затвор од ден на ден стануваат неподносливи. Осудениците континуирано се жалат на лошата исхрана, на кратењето и неисплаќањето на дневниците за работа, а сега реагираат дека управата се' уште не им обезбедила греење во ќелиите. (А.Б.)