Бистите на хероите во визби

Тетово се мисли каде да ги стави бистите на народните херои Тодор Циповски и на Гоце Стојчевски

Гојко Ефтоски


ТЕТОВО - Бистите на двајцата народни херои од Тетово, Тодор Циповски-Мерџан и Гоце Стојчевски-Амбарче, повеќе од две години се наоѓаат во визби изложени на прав и на други можни оштетувања. На новиот реконструиран плоштад, најверојатно, ќе нема место за нив.

„Целата постапка за реконструкција на плоштадот, заклучно со тендерот и почетокот на работите, била на претходното општинско раководство. Тоа е одговорно за симнувањето на бистите од местото каде што биле поставени. Официјално, во Општината нема информација каде се и во каква состојба се наоѓаат“, вели Фљакран Пустина, портпарол на Општина Тетово.

Реконструкцијата на централниот дел на Тетово официјално е започната на 4 октомври 2008 година. Тендерот го добила градежната фирма „Еуропроект“ од Тетово, кој е изведувач на работите. Отстранувањето на постаментот и изнесувањето на бистите било извршено уште во првите денови. Овој чин не се одвивал пред очите на јавноста, зашто целиот простор бил ограден со висока ограда и без увид што се работи. Работите се изведувани под стручно надгледување на надзорен орган. Реконструкцијата се' уште не е довршена, а работите траат повеќе од две години.

„Колку што ни е познато, бистите ги зел изведувачот на работите. Неколку пати во Советот на Општината го инициравме прашањето за поставување на бистите, но досега нема конкретна активност. Речено ни е дека ќе бидат поставени кога ќе завршат работите. Сметаме дека локалната власт е таа што треба да покаже поголем интерес и грижа за спомениците“, ни рекоа членовите на Советот на Општина Тетово, Драган Давидовски (ВМРО-НП) и Зоран Митревски (НСДП).

Од Боречката организација во Тетово добивме информации дека „бистите се на сигурно место“ и дека со општинските органи е постигнат договор за нивно поставување. „Не инсистираме да бидат вратени на истото место каде што беа неколку децении. Меѓутоа, бараме да се постават во центарот на градот, пред Центарот за култура, каде што сега се наоѓаат Споменикот на револуцијата и Жена-борец“, рече Стојан Петрушевски од Сојузот на борците од Тетово.

Најнапред било договорено поставувањето да се изврши на 8 Септември - Денот на независноста, а потоа на 11 Октомври - Денот на востанието. Бидејќи тоа не се случи, сега очекуваат бистите да бидат поставени за 19 Ноември - Денот на ослободувањето на Тетово. Секретарот на Општина Тетово, Дрита Мехмети, ни потврди дека било пристигнато официјално барање од Боречката организација. „Ова барање ќе се најде пред советниците на првата наредна седница. По негово разгледување и произнесување, ќе бидат преземени соодветни дејства“, вели Мехмети.