Лозарите од Тиквешијата во паника

Неизвесноста е голема, бидејќи ниедна визба не кажува дали ќе откупува грозје и по колкава цена

Ангел Данов

КАВАДАРЦИ, НЕГОТИНО - Лозарите од Тиквешијата го бараат спасот во советниците. Нерешениот пласман на годинашнава реколта, како и наталожените проблеми од минатото, од кои најжежок е нецелосната исплата од винарските визби, беа предмет на жестоки распр��вии во советите на општините Кавадарци и Неготино, каде што не изостанаа и предлози за радикални мерки. Сепак, конкретни решенија за проблемите на лозарите, изостанаа.

Така, во Кавадарци, советниците од советничката група на СДСМ ја напуштија 23. седница на Советот на Општината откако не се постигна согласност како прва точка на дневен ред да се најде актуелната состојба со бербата, пласманот и цените за грозјето. По кратката пауза за координација, советниците од мнозинството составено од советничката група на ВМРО-ДПМНЕ и останатите советници од опозицијата од независната група на Панчо Минов и еден советник од НСДП се договорија Советот да одржи посебна седница на која ќе се расправа за грозјето, но откако деновиве ќе се одржи средба меѓу Владата и винарските визби.

Советникот Панчо Минов предложи Советот да биде во постојано заседание се' до решавање на проблемот на лозарите, но го изнесе и својот став - да се излезе на протест пред „Тиквеш“ и Владата за да се изврши притисок и да се надмине проблемот.

Пред да ја напуштат седницата, советникот од СДСМ, Ташо Радњански, запраша и побара да се дискутира за тоа кој и зошто го крши Законот за вино и за земјоделска дејност. Радњански побара државните инспекциски служби да го спроведат законот и да ги казни визбите што го кршат Законот.

Лозарите во Кавадарци се во голема неизвесност, бидејќи ниедна визба не кажува дали ќе откупува грозје и по колкава цена. Производителите на грозје стравуваат дека грозјето ќе им остане на нивите бидејќи само тактизирања доаѓаат од сите страни, а не се кажува ништо конкретно. Велат дека подобро да им се дозволи родот да го истурат на градската депонија „Мелци“ отколку да им го дадат на визбите кои профитираат на нивната мака. Се' уште големи суми визбите им должат на лозарите и за ланското грозје.

За актуелните состојби во лозарството на седница расправаше и Советот на Општина Неготино. На седницата беа присутни и лозари од регионот кои дојдоа да слушнат од општинската власт дали има новини околу пласманот на грозје и цените за откуп. Советниците едногласно заклучија на лозарите да им се исплати во целост лани предаденото грозје заклучно со 5 септември оваа година, потоа формирање пазарна цена на винското грозје, дефинирање минимална цена на чинење на винското грозје по сорти, а во рок од 15 дена откупувачите да им исплатат на лозарите 30 отсто од парите за родот кој ќе им го предадат од оваа реколта.

Советот усвои и предлог-заклучок Владата наместо субвенција од 2 денара за килограм откупено грозје да им дава на винарите, тие пари да им ги даде на лозарите по претходно изготвен список од страна на откупувачите како и ВВ „Повардарие“ за време на откупот приоритет да им даде на лозарите од Неготинско, кои гравитираат овде, а потоа да зема грозје од други региони.

Кавгите и недоразбирањата беа белег и на завчерашната седница, која се одржа по повеќе од пет месеци. Мнозинството советници, составено од советниците на СДСМ и независната група советници, го разрешија претседателот на Советот, Ванчо Апостолов, и на негово место седна новоизбраниот Сашко Николов. Досегашниот претседател смета дека советничката Маја Митрова од независните советници нема право да одлучува, туку само да биде присутна на седница, поради што и немало легитимитет неговото разрешување. Побара асистенција од полицијата за да го отстрани новиот претседател, но тоа не се случи, бидејќи без да има физички пресметки, полицијата немала право да интервенира.

Неготинци се прашуваат до кога ќе трае циркусот во нивниот Совет и до кога градот ќе биде во заложништво на лични и партиски интереси на советниците.