Во убиството во Охрид учествувал и член на „пинк пантерите“

Весникот „Блиц“ пишува дека осомничениот по кого трага полицијата е дел од познатата група за грабежи на златарници

Драган Ѓорѓевиќ (29) од Лесковац, осомничен за свирепото убиство на 34- годишниот белграѓанец Дејан Новаковиќ во Охрид, е член на криминалната група „Пинк Пантер“, позната во светот по многубројни грабежи на златарници. Ова го пишува српскиот весник „Блиц“, изнесувајќи детали за минатото на Ѓорѓевиќ, по кого трага македонската полиција откако тој избега од Охрид по крвавиот инцидент кога од поголема група насилници до смрт беше претепан белграѓанецот Дејан Новаковиќ.

„Блиц“, повикувајќи се на свои извори, наведува дека Ѓорѓевиќ пред три години бил уапсен во Холандија поради сомневање дека е член на групата, која во април 2007 година од златарницата „Граф“ во трговскиот центар „Вафи“ во Дубаи ограбила накитот вреден повеќе од 11 милиони евра. Балканската криминална банда позната под името „Пинк Пантер“ се зборува дека ја сочинуваат околу 200 професионални криминалци, кои имаат извршено 150 грабежи на скапоцен накит во светот. Процените се дека вредноста на пленот од грабежите достигнува вредност од 250 милиони евра.

Според податоците на Интернет-сајтовите, бандата ја сочинуваат, главно, луѓе од земјите на поранешна Југославија, кои се специјализирани за грабежи во ексклузивни златарници, каде што се продаваат накит, дијаманти и скапи часовници. Јадрото на групата го сочинуваат криминалци од Цетиње, Црна Гора, кои имаат широка мрежа на соработници на Балканот. Името на бандата и' го дадоа лондонските весници пред седум години по грабежот во центарот на Лондон, што беше изведен во стилот што личеше на сцените од филмовите за „Пинк Пантер".

Како што пишува „Блиц“, по убиството во Охрид, Ѓорѓевиќ веднаш заминал во својот хотел, си ги зел работите и побегнал. Веќе во петокот утрото за него е распишана потрага, дури и на границата со Србија бил запрен маж што потсетувал на Ѓорѓевиќ, кој по проверката на идентитетот, бил пуштен. Претпоставките се дека тој побегнал од земјава.

Весникот потсетува дека на убиството на Дејан Новаковиќ му претходела тепачка во локалот „Куба либре Хавана“, која продолжила и пред локалот. „Еден од сопствениците на клубот, Митре Костовски, кој е уапсен поради сомневање дека учествувал во убиството на Новаковиќ, со Ѓорѓевик бил пријател, а се запознале во Холандија. Костовски притрчал и и' се придружил на групата во која бил Ѓорѓевиќ, која веќе била бројно поголема и веќе се тепала со Новаковиќ и со неговиот другар Горан Периќ“, пишува „Блиц“. Тепачката имаше крвав епилог кога поголема група му се нафрлила на Дејан Новаковиќ, бркајќи го низ градот, по што го удирале со тупаници се' додека не починал. (Х.Р.)