Работник загина во хаварија во касарната „Илинден“ во Скопје
Бајрам Бајрами (34) загина, а негов колега е повреден во котларницата за парно греење
Работник во цивилната служба на АРМ загина, а друг се здоби со полесни повреди во несреќата што завчера се случи во котларницата за парно греење во касарната „Илинден“ во Скопје. Несреќата се случила поради хаварија во инсталацијата во котларницата, соопштија надлежните. Двајцата работници за време на несреќата извршувале редовни задачи во котларницата, каде што досега не биле забележани проблеми.
Трагедијата се случи во четвртокот, околу 12,30 часот. Триесет и четиригодишниот Бајрам Бајрами од Скопје загина, а неговиот две години постар колега И.Б. (36) се здоби си изгореници во пределот на лицето и по телото.
„Двајцата работници работеле на одржување на котларницата. Б.Б. сакал да отвори вентил, но тој експлодирал и работникот загинал на самото место. Од испуштената пареа неговиот колега И.Б. се здобил со полесни повреди и е надвор од животна опасност“, велат од Министерството за одбрана. Од полицијата соопштуваат дека по експлозијата на вентилот, метални парчиња се забиле во главата на Бајрами, а како последица од тоа починал на самото место. По укажаната лекарска помош неговиот колега е пуштен на домашно лекување.
Веднаш по инцидентот на терен излегле истражни органи, кои извршиле увид. Истрагата е во тек и по нејзиното завршување ќе се знае повеќе за причините поради кои дошло до несреќата. Според МО, причина за инцидентот била хаварија на инсталацијата во котларницата за парно греење.
Работниците биле вработени како цивилни лица во служба во АРМ. (Г.А.) |
