Одбрано решението за барокната катна гаража

За катната гаража на Јужен булевар Градот треба да одлучи меѓу 10 понудени идејни решенија

Јавното станбено претпријатие ќе ја гради барокната гаража зад МЕПСО по идејно решение на „ГМС проект“, додека Градот Скопје се' уште го одбира изгледот на едната од двете катни гаражи кои е предвидено да имаат стаклени фасади. Од ЈПССДП веќе утврдиле и дека пристапот за паркирање во другите три катни гаражи ќе се врши преку лифтови.

Ова е моменталниот исход од речиси двемесечните активности на Јавното станбено претпријатие и Градот, откако државата одлучи да им отстапи локации за изградба на објекти за паркирање, при што ЈПССДП доби можност за изградба на четири катни гаражи, а Градот, односно ЈП „Градски паркинг“ две.

Владимир Бахчовановски, директор на Јавното станбено претпријатие, вели дека се подготвува документација за нарачка на основниот проект за барокната катна гаража, а истовремено течат постапките и за проектирање на останатите три објекти.

„Реално, имајќи ги предвид неопходните процедури, очекуваме со изградба на гаражите да започнеме во почетокот на идната година. Со оглед на досега направените процени, утврдивме дека имаме доволен буџет сите четири проекти да ги тераме истовремено“, вели Бахчовановски.

Јавното станбено претпријатие освен зад МЕПСО, ќе гради катна гаража и на постојниот мал паркинг кај „Телеком“, потоа кај Музејот на холокаустот и пред Работнички дом.

Од Градот, пак, информираат дека надлежната комисија го избрала идејното решение за катната гаража кај „Беко“, а се' уште одлучува кое од пристигнатите десет идејни решенија ќе се искористи за основа на планираната стаклена фасада на наменскиот објект што треба да се гради на „Мито Хаџивасилев-Јасмин“. И двете катни гаражи ќе имаат стаклени фасади, по еден кат резервиран за деловен простор, а инвеститор ќе биде ЈП „Градски паркинг“. (Дс.Т.)