ЈСП воведува пет нови линии

Од денеска ќе сообраќаат автобуси на линиите „18-а“, „4-а“, „7“ „7-б“ и „22-а“

Јавното сообраќајно претпријатие денеска во населеното место Визбегово ќе ја промовира новата автобуска линија „18-а“. По барање на граѓаните, да се подобрат сообраќајните врски со градски превоз и на останатите делови од градот, од денеска официјално ќе бидат пуштени и новите автобуски линии „4-а“, 7“, „7-б“ и „22-а“. Автобуските постојки се обележани и линиите функционираат нормално.

Линијата „18-а“ од Визбегово ќе сообраќа по улица „3“ и преку населбата Шуто Оризари ќе продолжи кон населбата Топанско Поле. Крајната станица ќе и' биде на улицата „Лазо Трповски“ кај сегашната последна „9“. Паралелно со „4“, сега ќе сообраќа и новата линија „4-а“. И таа ќе тргнува од населбата Хром, а ќе вози до селото Усје. Оваа линија ќе вози по идентична траса како „4“ од Хром до „Партизански одреди“, а потоа во Карпош 4 ќе врти десно и ќе оди по улицата „Московска“ кон студентскиот дом „Гоце Делчев“ каде што ќе продолжува лево по „Теодосие Гологанов“, па преку постојката на „Рекорд“ и улицата „11 Октомври“ по „Првомајска“ до Усје и обратно.

Линијата број „7“ наместо од населбата Лисиче, сега ќе тргнува од Горно Лисиче и ќе вози по постојната траса до Карпош 3 и обратно, додека новата линија „7-б“ има почетна станица во населбата Вардарска и ќе оди до Дом на печат.

Линијата „22-а“, пак, наместо од населбата Даме Груев, сега ќе тргнува од селото Волково.

„Навистина сакавме да им излеземе во пресрет на барањата на граѓаните и еве, собравме сили да го направиме тоа. Задоволни сме што дефинитивно одговоривме и на едно многу старо барање за воведување автобуска линија за жителите на Визбегово. Веруваме дека сите нови линии ќе ги задоволат барањата на граѓаните што бараа подобра врска до работните места и до нивните домови“, вели Мишо Николов, генерален директор на ЈСП. (Сн.К.)