Генералка во Аеродром

Денеска, утре и во првиот ден од наредната недела на подрачјето на Општина Аеродро�� ќе се се спроведе генерално чистење. Акцијата под мотото „Чист Аеродром“ ќе ја реализираат јавните претпријатија „Комунална хигиена“, „Паркови и зеленило“, „Водовод и канализација“ и „Улици и патишта“ во соработка со општинската и со градската власт. Предвидено е да се расчистуваат дивите депонии, да се мијат улиците, ќе се уредува блоковското зеленило, парковите и дрворедите, а е предвидена и санација на хидранти, чешми за вода и шахти, како и крпење на ударните дупки по улиците.

Аеродромци ќе можат да го исфрлат и волуменозниот отпад од домаќинствата во специјални контејнери. Денеска такви контејнери ќе има поставено кај ОУ „Гоце Делчев“ во Горно Лисиче, на улицата „XII Ударна бригада“ во населбата Лисиче, како и кај градинката во близина на сервисот „Морски“. Утре, пак, контејнери за волуменозен отпад ќе има кај сателитската антена во Ново Лисиче, пред Пензионерскиот дом и во близина на спортската сала „Јане Сандански“. В понеделник, последниот ден од акцијата, наменски контејнери ќе бидат поставени на улицата „Венијамин Мачуковски“ во Мичурин, кај ОУ „Браќа Миладиновци“ и на улицата „Коста Новаковиќ’.

„Чист Аеродром“ ќе се спроведе во сите населби, а покрај екипите на јавните претпријатија, во генералката ќе бидат ангажирани и стотина сезонски работници од Општината.

Идентична акција изминативе денови се реализираше во речиси сите општини. Аеродром е претпоследна на листата за генералка, а акцијата ќе финишира на подрачјето на Општина Сарај. (Дс.Т.)