Црвенковски ќе ја води протестната колона

Бранко Црвенковски, шеф на најголемата опозициска партија, утре ќе го предводи протестниот марш низ скопските улици, а пред 15 часот се очекува да има кратко обраќање кај Собранието. Целта на неделниот протест е да и' се испрати уште една силна порака до власта дека треба да си замине, бидејќи води погубна политика што ја турка Македонија во изолационизам.

Сенародниот марш ќе значи охрабрување на оние што се плашат од притисоци од власта, „за достоинство на народот, за негова слобода, за правото на подобар живот“... На протестот ќе се придружи целиот опозициски фронт, но одделни партии, иако се во опозиција, најавија дека нема да се приклучат. Либералдемократите не го поддржуваат протестниот марш, бидејќи сметаат дека тоа не е марш на опозицијата, туку на СДСМ. Во Нова демократија на Имер Селмани, пак, велат дека го поддржуваат секој протест „против оваа анти ЕУ, анти НАТО и антиалбанска власт“, но дека физички нема да бидат присутни на маршот низ скопските улици, затоа што имаат слични активности, односно партиската агенда им налага средби со нивните гласачи и симпатизери. На протестот СДСМ не покани ниту една од албанските партии, кои не се во власта, а и тие не најавија присуство.

Иако утрешниот протест се случува нецели десет дена по штипскиот општонароден собир што го организираше СДСМ, на „Бихаќска“ се оптимисти дека маршот ќе биде масовен. Поаѓањето е закажано во 13 часот во Карпош 3, кај бензинската пумпа, а колоната ќе се движи низ „Партизанска“ се' до Собранието. Покрај тоа што нагласи дека СДСМ е одговорна партија и дека воопшто не размислува за насилно влегување во институциите на државата, Црвенковски упати апел до МВР да си ја извршуваат работата, строго почитувајќи го законот. (Б.Ј.)