Пресудата во Хаг ќе биде изречена на 10 јули
Пресудите за Љубе Бошкоски и за Јохан Тарчуловски ќе бидат објавени на 10 јули во 14,15 часот, дознаваме од извори блиски на двајцата македонски затвореници во Хаг. Конкретниот датум и седницата, уште завчеравечер им бил соопштена на бранителите на Бошкоски и на Тарчуловски, босанската адвокатка Едина Рашидовиќ и на скопскиот адвокат Антонио Апостоловски, кои веќе ги прават подготовките за заминување во Хаг. Судскиот процес почна на 16 април 2007 година, а во мај годинава беа изречени последните зборови, по што се очекуваше само пресудата. Хашкото обвинителство бара казни од 12 и 15 години за ексминистерот за внатрешни работи, Љубе Бошкоски и за Јохан Тарчуловски, поранешниот шеф на обезбедувањето на претседателот на државата, заради наводна нивна инволвираност за љуботенските настани од 12 август 2001 година. Одбраната, пак, очекува ослободителна пресуда, бидејќи смета дека ниту еден навод од обвинението не е потврден. (Г.Д.) |
