Газдата на А1 обвини за диктатура

Од раните утрински часови адвокатите што се јавуваат како бранители на осомниче��ите во случајот што, пред се', се врзува за името на Велија Рамковски, беа собрани пред скопскиот суд. Никој од нив не знаеше колкумина од оние што завчеравечер беа приведени во неколкуте полициски станици ќе бидат спроведени во кривичниот суд. Адвокатите немаа сознанија кога осомничените ќе бидат спроведено пред истражен судија од Одделот за гонење на организираниот криминал и корупција, а не знаеја за што ќе бидат осомничени Рамковски и управителите на неговите фирми од „Перо Наков“ број 60.

Уште од раните утрински часови паркингот на скопска „единица“ вчера беше испразнет и обележан со полициска лента. Како одминуваше времето, така растеше и тензијата. Многубројни новинарски екипи, од речиси сите медиуми, беа распоредени на платото од каде што се гледаше паркингот и влезот за возила на Основниот суд Скопје 1 - Скопје.

На општо изненадување на насобраните, меѓу кои роднини и блиски на оние што полицијата ги приведе претходната ноќ, со неколку џипови и во придружба на маскирани припадници на специјалните полициски сили беше спроведен сопственикот на А1 телевизија, Велија Рамковски.

Со безбол-капа и со високо кренати раце, најверојатно, за да се видат лисиците што му беа ставени на раце, Рамковски извика: „Диктатура на дело! Ова е демократијата на Груевски!“

Веднаш по Рамковски, но со раце скриени под дуксерот што го носеше, во судот влезе и директорката на телевизијата, Анета Кочишки.

Сето ова се случуваше само триесетина минути пред 12 часот, а потоа, наводно од Полициската станица „Карпош“ беа спроведени и другите осомничени. Имено, меѓу двете приведувања не минаа повеќе од петнаесетина минути. И во вториот случај имаше високо кревање на рацете од страна на еден од неколкутемина што вчера беа спроведени на распит.

Од моментот на приведување на осомничените, па се' до почнувањето на кривичната истрага мина еден и пол час. Пред 14 часот бранителите на осомничените се упатија кон Истражниот оддел. (Љ.С.)