СДСМ ќе ја гони Јанкулоска зашто го гонела само Велија

„Наместо на вистинска борба против криминалот и корупцијата, јавноста е сведок на селективна правда, односно неправда, политичка пресметка и класична злоупотреба на институциите. Власта продолжи со латиноамериканска демонстрација на сила, што преставува директна закана за сите оние што мислат поинаку од Груевски и од ВМРО-ДПМНЕ“, оцени вчера лидерот на СДСМ Бранко Црвенковски. Тој ги оквалификува апсењата на Рамковски и управителите на некои од фирмите на „Перо Наков“, меѓу кои и А1, како „брутална пресметка на режимот на Груевски и фамилијата со политичките неистомисленици“.

СДСМ ќе поднесе кривична пријава против министерката за внатрешни работи, Гордана Јанкулоска, затоа што не постапувала „по кривично дело ’перење пари‘ во случајот со 750 илјади евра најдени кај возачот на Медиа Принт Македонија“, соопшти Црвенковски. Тој ќе ја тужи Јанкулоска, но и директорот на УЈП, Горан Трајковски, и како што вели, за прикривање и непостапување по кривично дело „злоупотреба на службено овластување и положба“, во случајот со плаќањето партиски реклами на ВМРО-ДПМНЕ со буџетски пари, како што обвини сопственикот на А1, Велија Рамковски.

„Зошто токму сега институциите влегоа во А1 телевизија, а не пред 2-3 години? И зошто само во А1, а не и во други телевизии со провладина уредувачка политика? СДСМ е одговорна опозиција и има обврска да ја заштитува демократијата, човекови слободи, владеењето на правото и правната сигурност на граѓаните. Од тие причини, најавуваме дека ќе ја ставиме на тест правната држава“, рече Црвенковски на вчерашниот прес.

Според него, нема логичен одговор зошто биле потребни драматични апсења пред полноќ на лица, кои цел месец им се достапни на сите органи на прогонот. „Кој ќе понесе одговорност за повторно кршење на пресумпцијата на невиност, јавниот линч и оцрнувањето на семејствата на осомниченитешто вчера смислено го направија директорот на УЈП и портпаролот на МВР“, праша Црвенковски. (П.Р.)