Драгоцен бод за прилепчани во Скопје

Мечот меѓу Вардар и Победа заврши нерешено 0:0

Миодраг Мицковиќ

Гледајќи ги речиси празните трибини на арената „Филип Втори“ на дерби средбата, ако е тоа практично и дерби меѓу Вардар и Победа, на кои можеби немаше ни 200 гледачи не можеме а да не се потсетиме на оние убави денови кога трибините беа полни со можеби повеќе од 10.000 гледачи кога играа овие стари фудбалски ривали. Вардар, кој се бори со многу проблеми и финансиски, и на планот на раководењето на клубот, и Победа која е можеби во слична ситуација што се однесува до финансиите не прикажаа којзнае каква игра во првото полувреме. Вардар беше поангажиран, имаше и две убави шанси. Најпрвин преку Ступиќ во 20 минута кога не успеа да госовлада голманот Пачовски, а девет минути подоцна во слична ситуација се најде и Ејупи, но и тој не се снајде најдобро. Единствената шанса Победа ја имаше во 15 минута кога Нестороски убаво се проби од левата страна и во моментот кога требаше да ја упати топката кон голот на Вардар Белчев со пожртвувана интервенција ја исфрли топката во корнер. И тоа беше практично се' што видовме во првото полувреме.

Во второто полувреме гледавме малку повозбудлива игра, повторно имаше шанси и од едната и од другата страна, но двајцата голмани и Пачовски и Маџовски беа во форма. Најголемата шанса сигурно ја имаше Чурлинов во 80 минута кога со глава биеше од непосредна близина покрај самата статива, а неколку минути подоцна и Ејупи беше во слична ситуација, но и неговиот удар со глава заврши покрај голот. И кога се чинеше дека мечот ќе заврши во судиското продолжение, Чурлинов се проби низ центарот на игралиштето кога се најде некаде на околку дваесетина метри од голот на Маџовски, неспортски го сопре Џангаровски кој заработи црвен картон.

Вардар - Победа 0:0



Стадион: „Филип Втори“ во Скопје. Гледачи: 200. Судија: Зоран Петковски од Велес. Црвен картон: Џангаровски (Вардар).

Вардар: Маџовски, Крстевски, Ристовски, Трипуновски (Идризи), Белчев, Ристов (Пандевски), Пеев, Костенцовски, Џангаровски, Ејупи, Ступиќ.

Победа: Пачовски, Митревски, Мирчески, Дамески, Јовановиќ, Стојанов, Ристов, Марковиќ Ацевски (Чурлинов), Петровиќ, Нестороски.